Վերջին օրերին մամուլը պարբերաբար գրում է, որ Արցախի նախագահը շուտով պաշտոնից կազատի պետնախարար Ռուբեն Վարդանյանին։
Մեր ունեցած տեղեկություններով՝ Ռուբեն Վարդանյանը կտրականապես հրաժարվել է հրաժարականի դիմում ներկայացնել, ինչը կստիպի Արայիկ Հարությունյանին պարզապես պաշտոնանկ անել պետնախարարին: Ամենայն հավանականությամբ, վաղը՝ փետրվարի 23-ին, Արցախի նախագահը հեռուստատեսությամբ հանդես կգա հրապարակային ելույթով, որտեղ կհայտարարի, որ պաշտոնանկ է անում Ռուբեն Վարդանյանին: Արդեն երեկ հայտնի դարձավ, որ Արցախի գլխավոր դատախազ Գուրգեն Ներսիսյանը Արցախի Հանրապետության պետական նախարարի պաշտոնը ստանձնելու առաջարկ է ստացել Արայիկ Հարությունյանից: Բացի այդ, Ռուբեն Վարդանյանն Արցախի ռուսահպատակ հատվածից ունի աջակցություն։
Ինչ վերաբերում է պատճառներին, հավանական է, որ Արայիկ Հարությունյանը նման հրահանգ ունի Ռուսաստանի ղեկավարությունից:
Ամենահետաքրքիր հարցերից մեկն այն է, թե պաշտոնանկությունից հետո ի՞նչ է անելու Ռուբեն Վարդանյանը, արդյոք նա կմնա Արցախում և կշարունակի բարեգործական ծրագրեր իրականացրել, թե՞, ինչպես կանխատեսում են շատերը, ձիու վրա նստած կգա առաջնորդելու Հայաստանում Նիկոլ Փաշինյանին գահընկեց անելու օպերացիան։ Եվ այդ դեպքում, ՀՀ օրենսդրությունը որքանով է թույլ տալիս, որ Ռուբեն Վարդանյանը Հայաստանում հավակնի պատգամավորի կամ կառավարության անդամի ու ղեկավարի պաշտոնին
Այս առնչությամբ, «Իրազեկ քաղաքացիների միավորում» ՀԿ ծրագրերի ղեկավար Դանիել Իոաննիսյանը «Առաջին լրատվական»-ի հետ զրույցում նշեց. «Տարբեր պաշտոնների համար Սահմանդրությունը տարբեր ժամկետներ է նշում, եթե խոսում ենք կառավարության անդամի կամ պատգամավորի մասին, ապա ժամկետը 4 տարի է: Այսինքն անձը պետք է լինի միայն ՀՀ քաղաքացի և չորս տարի բնակվի Հայաստանում, ինչը նշանակում է, որ չորս տարվա մոտ 1460 օրից 730 օրը, այսինքն կեսը պետք է բնակված լինի ՀՀ-ում։
Հայաստանի նախագահի մասով ամեն ինչ նույնն է, միայն թե Հայաստանում բնակվելու նվազագույն ժամկետը վեց տարի է»:
Իոաննիսյանի խոսքով, այս տեսանկյունից Ռուբեն Վարդանյանը չի կարող հավականել նախագահի պաշտոնին 5,5 տարի, իսկ ԱԺ նախագահ կամ կառավարության անդամ լինելու համար՝ մոտ 3,5 տարի:
Հաջորդ ԱԺ ընտրությունները կրկին 3,5 տարուց են, կդժվարանամ ասել՝ ինքը ճշգրիտ հրաժարվել է արդյոք ՌԴ քաղաքացիությունից և երբվանից է ՀՀ քաղաքացի։ Հետո կախված է նրանից, եթե արդյոք Ռուբեն Վարդանյանը հավակնում է մասնակցել հայաստանյան ընտրություններին։ Բայց ինձ թվում է, որ ժամկետների մեջ տեղավորվում է, ինքը թե պատգամավորի, և թե կառավարության անդամի ժամկետի մեջ տեղավորվում է, եթե հավակնի որևէ պաշտոնի»,-ասաց Իոաննիսյանը: