Շատերը գուցե չեն էլ պատկերացնում, թե ինչ կարևոր օր է այսօր. Արման Բաբաջանյան

Շատերը գուցե չեն էլ պատկերացնում, թե ինչ կարևոր օր է այսօր:

Փետրվարի 20-ից մեկնարկող Եվրոպական դիտորդական երկամյա առաքելության տեղակայման վերաբերյալ որոշումը նորանկախ Հայաստանի թերևս եզակի, ամենասուվերեն արտաքին քաղաքական որոշումն է:

Փոքր, գուցե աննշան քայլ է, բայց Հայաստանը վերջապես ինքնուրույնաբար փորձում է հարափոփոխ այս աշխարհում իր տեղը, դիրքը հաստատել:
Ողջունում ենք Հայաստանի իշխանության այս պատմական որոշումը:

Հավատացած ենք, որ այն երկրի համար ճակատագրական նշանակություն է ունենալու:

Այսուհետ Հայաստանի ռազմավարական վերակողմնորոշումը այլընտրանք չունի և այդ ուղղությամբ կարևոր քայլն արված է:

Որոշումը հեշտ չի տրվել և հեշտ չի տրվելու: Այն իր մեջ բազմաթիվ ռիսկեր է պարունակում, այդ թվում ներքին:

Չափազանց էական և կարևոր է մեր երկրի պաշտպանունակության, անվտանգության համար այս գերզգայուն ժամանակներում քաղաքական և քաղաքացիական շրջանակների սթափ, զգոն, պատասխանատու վարքագիծը:

Մեզ բոլորիս պետք է միավորի ժողովրդավարական և ինքնիշխան Հայաստանի հարատևության տեսլականը:

Մեր քաղաքական տարաձայնություններն ու տարբերությունները այսօր էական և կարևոր չեն: Այս պատմական պահին առաջարկում եմ կենտրոնանալ երկրի արտաքին և դրանից բխող ներքին մարտահրավերների և սպառնալիքների վրա:

Միասնաբար կանգնենք երկրի պետականության պաշտպանության գործին և հաղթանակը Հայաստանինն է լինելու, բոլորինս է լինելու, Արցախինն ու համայն հայ ժողովրդինն է լինելու:

Արման Բաբաջանյան

Հանուն Հանրապետության կուսակցություն

նախագահ