Օրերս Wikileaks-ի կողմից 2009թ-ի մայիսի 8-ին Հայաստանում ԱՄՆ դեսպան Մարի Յովանովիչի և ՀՀ երկրորդ նախագահ Ռոբերտ Քոչարյանի հանդիպման մասին հրապարակված զեկույցից պարզվել էր, որ Ռ.Քոչարյանը ԱՄՆ դեսպանին իր թերահավատությունն է հայտնել «Հազարամյակի մարտահրավերներ» ծրագրի մասին և ասել է. «Դա ամենամեծ բլեֆն էր»` նշելով, որ ծրագրի նախնական փուլում բազմաթիվ քննարկումներ են եղել, թե ինչպես օգնել Հայաստանին, սակայն ի վերջո ոչինչ էլ չի իրականացվել այդ ծրագրի շրջանակներում:
Քոչարյանը նշել էր, թե ծրագրի գումարներից ոչ մի կոպեկ չի ծախսվել իր նախագահության շրջանում: Նա մասնավորապես նշել է, որ երբեք չի հավատացել ծրագրի կենսունակությանը, քանի որ դրա նպատակները երկու հակառակ ուղղություն ունեն: Դեսպան Յովանովիչը հերքել է Քոչարյանի խոսքերը և առաջարկել ծանոթանալ Հայաստանում «Հազարամյակի մարտահրավեր»-ի իրականացվող ծրագրերին: Յովանովիչը նշել է, որ Հայաստանի գյուղատնտեսությանը այդ ծրագրի շրջանակներում մեծ օժանդակություն է ցուցաբերվում:
Քոչարյանը նաև նշել է, որ ինքը չի հասկանում, թե ինչ պատճառով է ԱՄՆ սառեցրել ծրագիրը, ինչին ի պատասխան Յովանովիչն ասել է, որ նման որոշումը կայացվել է 2008թ-ի ընտրություններին հաջորդած բռնությունների կապակցությամբ: Քոչարյանն իր կողմից ավելացրել է, որ ծրագիրը չպետք է քաղաքականացվեր, իսկ Միացյալ Նահանգները չպետք է որևէ մեկին ճնշումների ենթարկեր և կասեցներ երկրի զարգացմանն ուղղված ծրագրերը:
Այսօր «Հազարամյակի մարտահրավեր» հիմնադրամ – Հայաստան ՊՈԱԿ-ի գլխավոր գործադիր տնօրեն Արա Հովսեփյանին լրագրողները հարց ուղղեցին Ռոբերտ Քոչարյանի վերոնշյալ հայտարարությունների առիթով. «Ճիշտն ասած մեկնաբանություն չունեմ, որովհետեւ այդ երկխոսության մանրամասները չգիտեմ, չեմ պատկերացնում, բայց կարող եմ ասել, որ իրոք, մեր ծրագիրը իր հիմնական իրականացման փուլ մտավ մոտավորապես 2009 թվականից:
Մինչեւ այդ հիմնականում իրականացվում էր նախապատրաստական, ուսումնասիրման, նախագծային աշխատաքններ, որոնք այդքան վիզուալ չէին: Հիմանական մեր գործունեությունը կարելի է ասել սկսվել է 2009-ի նույնիսկ կեսերից, չհաշված գյուղական ճանապարհների ծրագիրը, որը սկսեցին 2008-ին, բայց հետո սառեցվեց: Այսինքն, այդ առումով, նախկին նախագահը ճիշտ է, իր նախագահության ընթացքում շատ վիզուալ գործունեություն չէր ծավալվում», նշեց Ա.Հովսեփյանը` համաձայնելով կրագրողների այն դիտարկմանը, որ փաստորեն Ռ.Քոչարյանի գործունեության պատճառով է կասեցվել ծրագիրը:
