ՀՀԿ-ական Ռաֆիկ Պետրոսյանը հերքում է ԲՀԿ-ական Արամ Սաֆարյանին, իսկ Արամ Սաֆարյանը` Ռաֆիկ Պետրոսյանին: Բանն այն է, որ իր այսօրվա ասուլիսի ժամանակ ՀՀԿ-ական Ռաֆիկ Պետրոսյանը ԲՀԿ խմբակցության քարտուղար Արամ Սաֆարյանին «մեղադրել է» վրիպում թույլ տալու մեջ: «Ես զարմանում եմ, որովհետև պարոն Սաֆարյանը շատ զգույշ քաղաքական գործիչ է, և նա պետք է իմանար եւ գիտի, իհարկե, որ իշխանությունները չեն ընդունում, որ մեր երկրում կան այսպես կոչված քաղաքական հանցագործներ, ինչպես իրենք են բնորոշում՝ քաղաքական բանտարկյալներ։ Եվ եթե չի ընդունում իշխանությունը, որ կան քաղաքական բանտարկյալներ, ինչպե՞ս կարող է կոալիցիան հավաքվել և քննարկել քաղաքական բանտարկյալներին ազատելու հարցը։ Այդ հարցում կա՛մ լրագրողները լավ չեն հասկացել, կա՛մ պարոն Սաֆարյանը վրիպում է թույլ տվել։ Այդպիսի բան չկա, այդպիսի խոսակցություն էլ չկա, այդպիսի հարց էլ դրված չէ օրակարգում»,- հայտարարել էր Ռաֆիկ Պետրոսյանը։
Մեկնաբանությունների համար դիմեցինք Արամ Սաֆարյանին: «Ես համոզված եմ, որ ՀՀ-ում քաղբանտարկյալներ չկան: ՀՀ-ում կան կալանավորված մարդիկ, որոնք ձերբակալվել են քաղաքական գործունեության արդյունքում կատարված քրեական հանցագործությունների համար: Բայց նրանց ազատման հարցը իսկապես հարց է, գոյություն ունի եւ իրավական լուծում պետք է ունենա եւ արդեն իսկ իրավական լուծման փուլում է»,- հայտարարեց Սաֆարյանը: Վերջինս նաեւ փոխանցեց. «Կարծում եմ` մենք պետք է ունենանք աշխատանքային քննարկումներ, որոնց արդյունքում իմանանք` ԵԽԽՎ մոնիտորինգի հանձնախմբի համազեկուցող Պրեսկոտի, մարդու իրավունքների պաշտպան Համմարբերգի ՀՀ կատարելիք այցերի շրջանում ՀՀ իշխանություններն ինչ դիրքորոշումներ են որդեգրելու: Եվ ասեմ` այդպիսի աշխատանքային քննարկումներ արդեն իսկ անցկացվում են»,- նշեց Արամ Սաֆարյանը: Վերջինս ըստ էության, հերքեց ՀՀԿ-ական Ռաֆիկ Պետրոսյանին ու նշեց, որ ինքը մի նման աշխատանքային քննարկման մասնակցել է եւ նման քննարկումներ էլի են լինելու: Հավելյալ մանրամասներ Սաֆարյանը չհաղորդեց` մեկնաբանելով, որ դրանք աշխատանքային հանդիպումներ, քննարկումներ են եղել: