Այսօր «Տեսակետ» մամուլի ակումբում գերմանաբնակ հայ պրոֆեսիոնալ բռնցքամարտիկ Դավիթ Գրաֆը (Վահագն Սահակյան) խոսեց օգոստոսի 27-ին հունգարացի Վիկտոր Շալայի նկատմամբ տարած հաղթանակի մասին և շնորհավորեց Վիկ Դարչինյանին՝ երկու օր առաջ տարած հաղթանակի կապակցությամբ:
«Ես Վիկին խոսք էի տվել, որ անպայման ներկա կլինեմ նրա մենամարտին և պահեցի խոստումս: Շնորհավորում եմ Վախթանգին. նա գեղեցիկ հաղթանակ տոնեց: Հիմա կխոսեմ իմ մենամարտից: Հակառակորդս 10 տարի ինձնից մեծ էր և անցկացրել էր 55 հանդիպում, բայց ես նրան նոկաուտի ենթարկեցի առաջին ռաունդում: Մարտն ընդամենը մեկ րոպե երեսունմեկ վայրկյան տևեց»,- ասաց Գրաֆը:
Մարզիչը նույնպես խոսքը սկսեց Վիկին շնորհավորելով. «Վախթանգը չափազանց լավ մարտ անցկացրեց և գեղեցիկ հաղթանակ տոնեց: Նա մեծ պատասխանատվություն էր կրում: Գովելի է, որ նա հաղթանակը նվիրեց անկախության 20-ամյակին: Շնորհավորում եմ Վիկին»: Անդրադառնալով Գրաֆին` Ժիրայր Բասմաջյանը նշեց, որ իր սանի ոճը նման է լեգենդար Մուհամեդ Ալիի ոճին, և նրան մեծ ապագա է սպասվում:
Նշենք, որ Դավիթ Գրաֆը պրոֆեսիոնալ բռնցքամարտիկի կարիերան սկսել է 2011 թ. և անցկացրած չորս մենամարտերում չորս հաղթանակ է տոնել` բոլոր չորս մարտերն էլ ավարտելով նոկաուտով: Նրան է պատկանում նաև ամենաարագ նոկաուտի ռեկորդը` երեք վայրկյան: