Ուկրաինայի պաշտպանության նախարար Ալեքսեյ Ռեզնիկովն այսօր ՆԱՏՕ-ի գլխավոր քարտուղար Յենս Ստոլտենբերգի հետ կայացած բանակցությունների ընթացքում քննարկել է Ուկրաինայի զինված ուժերի գործունեության մեջ դաշինքի չափանիշների ներդրումը: Այս մասին հաղորդում է Ռեզնիկովի գրառումը Facebook-ում:
«ՆԱՏՕ-ի գլխավոր քարտուղար Յենս Ստոլտենբերգի հետ քննարկեցինք ՆԱՏՕ-ի չափանիշների իրականացման հետագա քայլերի վերաբերյալ մեր հաջող որոշումները: Դրանց թվում է LOGFAS համակարգի՝ ՆԱՏՕ-ի և ՆԱՏՕ-ի անդամ երկրների լոգիստիկ տեղեկատվական համակարգերից մեկի ներդրումը», – գրել է Ռեզնիկովը: Նա հավելել է, որ LOGFAS համակարգը թույլ է տալիս նվազագույնի հասցնել պլանավորման ժամանակը և առավելագույնի հասցնել լոգիստիկ պլանների և հաշվետվությունների փոխանակման արագությունն ինչպես Ուկրաինայի զինված ուժերում, այնպես էլ Կիևի գործընկեր երկրների հետ:
Ուկրաինայի պաշտպանության նախարարը նաև Հյուսիսատլանտյան դաշինքի ղեկավարին ներկայացրել է, թե ինչպես է LOGFAS-ը գործում Ուկրաինայում: Ռեզնիկովը հավելել է, որ գործընկերների և բարեկամների հետ Կիևի հարաբերությունները կառուցված են «վստահության, թափանցիկության, միավորվածության և Ուկրաինայի հաղթանակի հանդեպ վստահությանե վրա:
Ավելի վաղ Ռեզնիկովը հայտարարել էր, որ Ուկրաինայի իշխանությունները պատրաստ են իրենց զենք ուղարկած ցանկացած արևմտյան պետության հաշիվ տալ, թե որ ստորաբաժանումում է այդ զենքը գտնվում։ Նրա խոսքով՝ Կիևը պատրաստ է օտարերկրյա տեսուչներին թույլ տալ Ուկրաինայի զինված ուժերի տեղակայման վայրեր, և եթե անվտանգության նկատառումներից ելնելով նրանք չկարողանան ժամանել մարտական գործողությունների շրջան, ապա Ուկրաինան պատրաստ է տրամադրել ցանկացած փաստաթուղթ:
