Փետրվարի 9-ից մեկնարկել է Հայաստանի և Ադրբեջանի միջև հարաբերությունների կարգավորմանն աջակցելու հարցերով ՌԴ արտաքին գործերի նախարարի հատուկ ներկայացուցիչ, ԵԱՀԿ Մինսկի խմբի ռուսաստանցի համանախագահ Իգոր Խովաևի այցը Հայաստանի Հանրապետություն։
Ռուս դիվանագետը հանդիպել է Նիկոլ Փաշինյանի, ՀՀ ԱԳ նախարար Արարատ Միրզոյանի և ԱԽ քարտուղար Արմեն Գրիգորյանի հետ։
ՀՀ կառավարության մամուլի հաղորդագրության համաձայն, զրուցակիցներն անդրադարձել են Ադրբեջանի կողմից Լաչինի միջանցքի ապօրինի շրջափակման հետևանքով Լեռնային Ղարաբաղում ստեղծված հումանիտար ճգնաժամին և դրա հաղթահարմանն ուղղված քայլերին, Փաշինյանն ընդգծել է Ադրբեջանի կողմից 2020 թվականի նոյեմբերի 9-ի եռակողմ հայտարարության հերթական խախտման փաստը և հայտարարությամբ ստանձնած պարտավորությունների լիարժեք իրականացման անհրաժեշտությունը.«Քննարկվել են նաև Հայաստանի և Ադրբեջանի միջև հարաբերությունների կարգավորման հնարավորություններին ու Լեռնային Ղարաբաղի հիմնախնդրին վերաբերող հարցեր»,- ասված է հաղորդագրությունում։
ՀՀ ԱԳՆ փոխանցմամբ, Միրզոյանն ու Խովաևը մտքեր են փոխանակել Հայաստանի և Ադրբեջանի միջև հարաբերությունների կարգավորման գործընթացի վերջին զարգացումների շուրջ։ նույնաբովանդակ հարղոդագրություն է հրապարակել նաև Հայաստանի Անվտանգության խորհուրդը։
Ինչու՞ Ռուսաստանը Լաչինի միջանցքի փակումից երկու ամիս անց միայն որոշեց ակտիվություն ցուցաբերել, հատկապես այն ֆոնին, երբ հայ-ադրբեջանական սահման են գալիս Եվրամիությնա դիտորդները։
Քաղաքագետ, «Հանուն Հանրապետության» կուսակցության փոխնախագահ Ռուբեն Մեհրաբյանի կարծիքով՝ Ռուսաստանը փորձեր է անում իր շահն առաջ տանել և նրա ցանկությունն է՝ պրոցեսից դուրս չմնալ. «Իսկ այդ ցանկությունն առաջ է գալիս, երբ նրանք բախվում են ամերիկյան ու հատկապես եվրոպական կողմի պատմականորեն աննախադեպ ակտիվությանը»,-«Առաջին լրատվական»-ի հետ զրույցում ասաց նա։
Մեհրաբյանի խոսքերով՝ շատ լավ գնահատելով այն հասարակական ֆոնը, որ կա Հայաստանում, ՀՀ քաղաքական դասի մեջ՝ առ այն, որ փաստորեն ռուսական քաղաքականությունն, ըստ էության, վարկաբեկված է Հայաստանում և շատ վատ համբավ է ձեռք բերել, ռուսներն այս ակտիվությամբ փորձում են պրոցեսից դուրս չմնալ. «Չեմ բացառում, որ ռուսները փորձեն ցույց տալ, որ դեէսկալացիայի ուղղությամբ ինչ-որ բան փոխվում է և դա իրենց շնորհիվ է, որպեսզի ինչ-որ ձևով կորցրած դիրքերը հետ բերեն, բայց ընդամենը չեմ բացառում, չեմ էլ պնդում՝ հաշվի առնելով, թե ինչ խայտառակ քայլեր է արել տարիներ ի վեր, ես նման շրջադարձը՝ այն էլ այս կրիտիկական պահին, դժվար եմ համարում»։
Մեր զրուցակցի խոսքերով՝ մենք նաև տեսնում ենք, որ հայտարարվեց մի պատմական իրադարձության մասին՝ այն, որ որ հայ-թուրքական սահմանով, Մարգարայի կամրջով Հայաստանից հումանիտար օգնության ավտոշարասյուն է հատել և գնացել դեպի աղետի գոտի.« Դա պարզապես շեշտակիորեն պատկեր է փոխվում տարածաշրջանում և ռուսների համար, այո՛ նոր խնդիրներ են առաջանում, որոնք ռուսները մտադիր են ինչ-որ ձևով լուծել, լրիվ զրոյին չհավասարվելու համար։ Մյուս կողմից էլ՝ ռուսներն, այնուամենայնիվ, չեն թողնում իրենց փորձերը մոնոպոլ դիրքերը պահել բանակցային գործընթացում՝ հաղորդակությունների ապաշրջափակման, դելիմիտացիայի,դեմարակցյաի հարցում։ Խովաևի ներկայությունն այստեղ ևս դրա մասին է վկայում, որ հավանաբար ինչ-որ թուղթ են բերել, ասելով՝ համաձայնվեք, հետո Բաքվի հետ մենք կխոսանք, Բաքուն էլ հետո մենք մի բան կանենք։ Չեմ կարծում,որ հայերը պետք է գնան դրան։ Երբ Բաքվից համաձայնություն կբերեք քայլերի, որոնք արդեն իսկ Գրիգորյան-Հաջիև-Սաալիվան և Պրահայի հանդիպման արդյունքներից բխող առաջարկություններին կհամապատասխանեն և երբ Բաքվում դրանց շուրջ համաձայնություն կլինի՝ նոր կարելի է քննարկել կամ մտածել քննարկելու մասին»։ Մինչ այդ, ըստ քաղաքագետի, հայկական կողմը պետք է ռուսների «խելքին չընկնի.«Ռուսներին պետք է պրոցես, որի գլխին իրենք են և Հայաստան, որն իրենց բռի մեջ է։ Այդ բոլոր մարմնաշարժումները դրա մասին են վկայում»։
Հնարավոր է ռուսների այս ակտիվությունը նպատակ ունի նաև վիժեցնել ԵՄ դիտորդների տեղակայումը հայ-ադրբեջանական սահմանին և արդյոք Հայաստանը կենթարկվի այդ ճնշմանը, մեր զրուցակիցը պատասխանեց.«Բացառում եմ դա, որովհետև ադ որոշումը Հայաստանի ու Եվրամիության երկկողմ համաձայնության արդյունքն է, և դա Ռուսաստանի գործը չէ, ինչպես ԵՄ ու ԱՄՆ ներկայացուցիչներն են ասել։ Ռուսները կփորձեն արժեզրկել , խփել այդ առաքելության էֆեկտիվությանը՝ այդ թվում նաև, այսպես կոչված, ՀԱՊԿ-ի դիտորդների թեման շրջանառելով։ Հայկական կողմը դրան չպետք է տրվի ու առաջ տանի արդեն իսկ ընդունած որոշումները, որոնք ուղղակիորեն բխում են ՀՀ շահերից»,-եզրափակեց նա։
