Ուկրաինայում ստեղծված իրավիճակում Ռուսաստանը դժվար թե դիմի Հավաքական անվտանգության պայմանագրի կազմակերպության (ՀԱՊԿ) գործընկերներին, եթե որևէ մեկը չցանկանա իր ներդրումն ունենալ։ Այս մասին հայտարարել է ՌԴ Դաշնային խորհրդի միջազգային կոմիտեի ղեկավարի առաջին տեղակալ Վլադիմիր Ջաբարովը. «Մենք կողմնակից չենք ՀԱՊԿ մեր գործընկերներին ներքաշելու այն իրավիճակին, որը մենք լուծում ենք Ուկրաինայում։ Դա մեր հատուկ օպերացիան է, եթե միայն ինչ-որ մեկը չցանկանա իր ներդրումն ունենալ։ Բայց ես չեմ կարծում, որ մենք կդիմենք այս երկրներին, նրանք նույնպես ուժեղ ճնշման տակ են»,- ասել է ռուսաստանցի գործիչը։
Քաղաքագետ Արմեն Հովհաննիսյանը «Առաջին լրատվական»-ի հետ զրույցում կարծիք հայտնեց, որ ՀԱՊԿ մյուս անդամներին և մասնավորապես Հայաստանին ամենամեծ ճնշողն իհարկե հենց իրենք են.«Բայց խնդիրն ն է, որ այդ երկրները վախենում են սանկցիաներից, չեն ուզում մարգինալացվեն աշխարհիից, ուզում են աշխարհի հետ կապերը պահպանել և չընկնել ծանր սանկցիաների տակ։ ՀԱՊԿ մյուս անդամները աշխատում են սանկցիոն ռեժիմին առերևույթ չխախտել։ Այդպես էլ պետք է լիներ։ Իսկ Ռուսաստանին պետք է ցույց տալ, որ դա իրենց թույլտվությամբ է տեղի ունենում, որ իրենց պրեստիժը չընկնի»,-նկատեց նա։
Միևնույն ժամանակ Հովհաննիսյանը չբացառեց, որ ինչ-որ փուլում, Ուկրաինայի դեմ սանձազերծած պատերազմի երկարացման համատեքստում, հնարավոր է նաև միանալու պարտադրանք լինի.«Բայց ես այդ երկրների մեջ չեմ տեսնում որևէ թեկնածու, որ դրան պատրաստ է։ Նրանք նաև ռիսկերը գնահատելով են այդ հայտարարությունն անում։ Եթե ճնշում գործադրեն ու մերժում ստանան՝ դա շատ ավելի վատ հեռանկար է իրենց համար»։
Ինչ վերաբերում է Հայաստանին, մեր զրուցակիցը նկատեց.«Ինչպե՞ս եք պատկերացնում, որ մենք դա անենք։ Մենք մեր սահմանը պաշտպանելու խնդիր ունենք, ես դա անհնար եմ համարում»,-եզրափակեց Հովհաննիսյանը։
Հայաստանի Եվրոպական կուսակցության նախագահ Տիգրան Խզմալյանն «Առաջին լրատվական»-ի հետ զրույցում անդրադառնալով Ջաբարովի հայտարարությանն ասաց.«Կարծում եմ, որ խոսել Հայաստանի մասին՝ որպես ՀԱՊԿ անդամ՝ անիմաստ է, իսկ ազգությամբ հայ Ջաբարովը պարզապես վերևից իջեցված առաջադրանք է կատարել, եթե չեմ սխալվում ՝նա հատուկ ծառայությունների գեներալ է։ Այդ մարդիկ իրենց երկիրը ոչ թե անդունդի եզրին են հասցրել, այլ վայր են նետել։ Ռուսաստանը մոտենում է անդունդի հատակին, երևի ինչ-որ տարօրինակ բնազդով ուզում են այդ անփառունակ ճանապարհին ձեռք բերել գործընկերներ»,-նկատեց մեր զրուցակիցը։
Խզմալյանն ընդգծեց՝ մենք անդունդից մեկ-երկու քայլ հետ ենք կանգնել.«Եվ նման կենացները գործընկերության մասին բավականին ձանձրալի են ու անլուրջ։ Ասել են, որ նման բան ասի՝ նա էլ ասել է։ Պետք է շարունակել հստակորեն կտրել այն բոլոր թելերը, որ մեզ կապում են Տիտանիկին. այն արդեն բախվել է սառույցին, պետք է մեր փոքրիկ տապանով հեռանանք, որքան հնարավոր է շուտ»,-եզրափակեց նա։