Վրաստանի և Խորվաթիայի արտաքին գործերի նախարարներ Իլյա Դարչիաշվիլին և Գորդան Գրլիչ Ռադմանը Թբիլիսիում կայացած հանդիպմանը ստորագրել են երկու երկրների միջև տնտեսական համագործակցության համաձայնագիր։ Այս մասին տեղեկանում ենք ТАСС գործակալությունից, այսօր հայտնել է Վրաստանի ԱԳՆ մամուլի ծառայությունը։
«Նախարար [Գրլիչ] Ռադմանի այցի շրջանակներում ստորագրվում է երկու կարևոր փաստաթուղթ՝ տնտեսական համագործակցության համաձայնագիր և փոխըմբռնման հուշագիր արտաքին գործերի նախարարությունների միջև», – մեջբերում է Վրաստանի ԱԳՆ մամուլի ծառայությունը Դարչիաշվիլի խոսքը:
Դարչիաշվիլին նաև հույս է հայտնել, որ մոտ ապագայում կաճի Խորվաթիայի ընկերությունների հետաքրքրությունը Վրաստանի ներդրումային ներուժի նկատմամբ։
Համատեղ մամուլի ասուլիսում Գրլիչ Ռադմանը նշել է, որ «վերջերս Զագրեբում բացվել է Վրաստանի դիվանագիտական ներկայացուցչությունը, որն է’լ ավելի կամրապնդի երկու երկրների բարեկամական կապերը։ Գրլիչ Ռադմանը Թբիլիսի է ժամանել իր առաջին այցով` երկու երկրների միջև դիվանագիտական հարաբերությունների հաստատման 30-ամյա հոբելյանի շրջանակներում։ Դիվանագետն արդեն հանդիպել է Վրաստանի վարչապետ Իրակլի Ղարիբաշվիլիի հետ: Վրաստան այցից առաջ Ռադմանն այցելել էր Հայաստան:
Ինչպես ավելի վաղ հայտնել էր «Արմենպրես»-ը, Հայաստանի արտաքին գործերի նախարար Արարատ Միրզոյանը և Խորվաթիայի արտաքին գործերի նախարար Գորդան Գրլիչ Ռադմանը ստորագրել են ՀՀ ԱԳՆ դիվանագիտական դպրոցի և Խորվաթիայի արտաքին գործերի և եվրոպական գործերի նախարարության դիվանագիտական ակադեմիայի միջև փոխըմբռնման հուշագիր դիվանագիտական կրթության և վերապատրաստման ոլորտում համագործակցության վերաբերյալ:
