Ազգային ժողովի պաշտպանության և անվտանգության հարցերի մշտական հանձնաժողովը մշակում է նախագիծ, ըստ որի՝ բոլոր այն պաշտոնյաները, որոնք կհրաժարվեն ներկայանալ 44-օրյա պատերազմի հանգմանքներն ուսումնասիրող քննիչ հանձնաժողով, նրանց նկատմամբ պատասխանատվություն կսահմանվի:
ԶՈՒ գլխավոր շտաբի նախկին պետ Մովսես Հակոբյանը բազմիցս հայտարարել է, որ չի ներկայանալու այդ հանձնաժողով: «Առաջին լրատվական»-ը փորձեց նրանից ճշտել՝ արդյոք այս դեպքում ստիպված կլինի՞ ներկայանալ հանձնաժողով: Ի պատասխան՝ Մովսես Հակոբյանը նշեց, որ թուրքական լրատվամիջոցին չի ուզում պատասխանել:
Հանրությանն ուզում ենք հիշեցնել Մովսես Հակոբյանի «սխրագործությունները»։ Մամուլը տարիներ շարունակ գրել է Մովսես Հակոբյանի չարաշահումներից։ Տարիներ առաջ Պավլիկ Մանուկյանը բաց նամակով տեղեկացրել էր, թե ինչպես տասնյակ հազարավոր լիտրերով բանակի վառելիքը Մովսես Հակոբյանը յուրացրել էր, թե ինչպես էր ցորենի բիզնեսն ամբողջությամբ իր ձեռքը վերցրել:
Հեղափոխությունից հետո էլ Մովսես Հակոբյանի կատարած չարաշահումների համար պատասխանատվության չենթարկեցին։ Միայն 2016-ին Վահան Բադասյանի հայտարարություններից հետո, որ Մովսես Հակոբյանը պաշտոնական դիրքն է չարաշահել, զինվորական դատախազը ուղարկել էր ՀՀ քննչական կոմիտեի զինվորական քննչական գլխավոր վարչություն նյութեր նախապատրաստելու համար:
Ավելի ուշ, սակայն,ՀՀ Քննչական կոմիտեն հաղորդագրություն է տարածել, որ Վահան Բադասյանի հաղորդումների հիման վրա քրեական գործ չի հարուցվի ՀՀ զինված ուժերի գլխավոր շտաբի պետ Մովսես Հակոբյանի դեմ՝ «հանցակազմի բացակայության հիմքով»։
Ավելին, Բադասյանը նշում էր, որ Ստեփանակերտում պաշտպանության բանակի միջոցներով Մովսես Հակոբյանը շքեղ առանձնատուն էր կառուցել, ապա այն բանակի վրա 1.2 միլիոն դոլարով վաճառել, ապա բանակի կողմից առանձնատունը նվեր ստացել։ Ի դեպ, Ստեփանակերտում կառուցած շքեղ առանձնատան մասին լուրերը Հակոբյանը երբեք չի հերքել։
