Լուսանկարը՝ Armeniasputnik-ի
Խորհրդարանում պաշտպանության նախկին նախարար Սեյրան Օհանյանի հանդեպ քրեական հետապնդում իրականացնելու համար գլխավոր դատախազի հայտի քննությունը հերթական անգամ ցցուն կերպով վկայում է, թե ինչպիսի «նվեր» է նախկին իշխանություն-ներկայիս ընդդիմությունը ներկայիս մեծամասնությանը: Այդ ընդդիմությունն ունի կենսագործունեության այնպիսի «պաշար», որ գործող մեծամասնության համար քարոզչա-քաղաքական «փաստարկների» անսպառ աղբյուր է: Իհարկե, տվյալ դեպքում անսպառ ոչ բացարձակ իմաստով, քանի որ մի օր այդ աղբյուրը սպառվելու է, առնվազն այն առումով, որ հասարակությունը տալու է շատ պարզ հարց՝ իսկ ի՞նչ եք անում դուք հիմա, որովհետև այն, ինչ արել են նախկինները, եղել է ձեր իշխանության գալու գլխավոր պատճառը: Նախկինների արածի հետևանքով է, որ հասարակությունը իշխանության է բերել ներկայիս մեծամասնությանը, չտալով հանգամանալից ու մանրակրկիտ հարցեր, որոնք սովորաբար պետք է տրվեն իշխանության ձգտող ցանկացած ուժի:
Հասարակությունն առաջնորդվել է մի տրամաբանությամբ՝ միայն թե փոխել հանրային ու պետական ռեսուրսի մսխման վրա ձևավորած և իշխող կառավարող համակարգը, միայն թե ժամ առաջ ազատվել այդ համակարգից: Հակառակ պարագայում, նոր իշխանությունը ստանձնած ուժը չէր կարող դիմանալ իշխանության մանդատ ստանալու որևէ քննության, որևէ ողջախոհ ու տրամաբանական հարցաշարի: Եվ հետագա գործընթացները հաստատում են վերը նկարագրածս, առ այսօր, և բառի բուն իմաստով այսօր նաև խորհրդարանում, որտեղ գլխավոր դատախազի հայտի տեսքով, մեծամասնությունը ստացել է քարոզչա-քաղաքական ակցիայի հիմնավոր առիթ, որովհետև դա այն թեման է՝ նախկին իշխանության որակն ու գործունեության տրամաբանությունը, որի պարագայում մեկնաբանությունները իսկապես ավելորդ են: Այդ պայմաններում թերևս ավելորդ է մտածել, թե գործող իշխանությունը կունենա քաղաքական ռեֆորմացիայի շահագրգռություն, ինչը կարող է փոխել քաղաքական հարաբերակցությունը և իշխանությանը զրկել «նվեր» նախկին իշխանություն-ընդդիմությունից: Սակայն, այդ հանգամանքը իհարկե որևէ կերպ չի կարող արդարացնել այն ուժերին, որոնք անվերջ տրտնջում են նախկին-ներկա «բանաձևից», երբեմն իրենք էլ հմտորեն սպեկուլյացիա անում այդ թեմաներով, և սպասում, թե որևէ մեկը նոր որակի և բովանդակության քաղաքական ստատուս-քվո է մատուցելու սկուտեղի վրա: