Վարչապետ Նիկոլ Փաշինյանը փետրվարի 6-ին հեռախոսազրույց է ունեցել Ֆրանսիայի նախագահ Էմանուել Մակրոնի հետ: Ըստ պաշտոնական հաղորդագրության, քննարկվել են Լաչինի միջանցքի արգելափակման հետևանքով Արցախում մարդասիրական խնդիրները, Արցախի ժողովրդի իրավունքների ու անվտանգության, ինչպես նաև ԵՄ դիտորդական առաքելության հետ կապված հարցեր: Փաշինյան-Մակրոն հեռախոսազրույցը տեղի է ունենում ռեգիոնալ բավականին բարդ իրավիճակում, որի քաղաքական կամ ավելի շուտ ռազմա-քաղաքական բաղադրիչներին ավելանում է նաև Թուրքիայի և Սիրիայի տարածքում ուժեղ երկրաշարժի ողբերգական հետևանքն իր ազդեցությամբ: Այդ հետևանքն իհարկե իր վրա է բևեռում մեծ ուշադրություն, միևնույն ժամանակ առաջացնելով նաև անվտանգության բացերի, վակուումների մեծ ռիսկ: Ֆրանսիայի նախագահի հետ Հայաստանի վարչապետի հեռախոսազրույցը թերևս նշանակալի է հատկապես այդ տեսանկյունից՝ ռիսկերի կառավարման, որը Հայաստանի համար առանց այդ էլ ունի մեծ նշանակություն: Երկրակեղևի ցնցումները առաջացնելով մարդկային ողբերգական հետևանք, անշուշտ կարևոր են դարձնում նաև այդ խառը իրադրությունում ռազմա-քաղաքական ցնցումային ռիսկեր թույլ չտալը, ինչի հանդեպ առավել քան զգայուն է Հայաստանը:
Անշուշտ, հայ-ֆրանսիական բարձր մակարդակի շփման օրակարգը լայն է միշտ էլ, սակայն տվյալ պարագայում անկասկած օրախնդիրը նոր իրողությունների, հիբրիդային բարդության աճի պայմաններում ուշադրության վրիպումներ թույլ չտալն է: Իսկ Ֆրանսիան այդ առումով թերևս այն կենտրոնն է, որտեղ Երևանը թերևս կարող է արժանանալ առավել լայն ունկընդրության, մի շարք նաև օբյեկտիվ պատճառների բերումով: Սրան զուգահեռ, Ֆրանսիայի նախագահի հետ Հայաստանի վարչապետի հեռախոսազրույցը թերևս ուշադրության է արժանի Հայաստանի արտաքին գործերի նախարարի Գերմանիա կատարած այցի համատեքստում: Արարատ Միրզոյանը Բեռլինում է, որտեղ փետրվարի 7-ին կհանդիպի այդ երկրի արտգործնախարարի հետ: Այյդ թեմային ավելի վաղ արած անդրադարձում ընդգծել էի հայ-գերմանական հաղորդակցության հարցում Ֆրանսիայի կարևոր պարագայի զուգահեռ գոյությունը, ֆրանս-գերմանական օրակարգի կարևոր ընդհանրությունների, և Հայաստանի շահերի ու հետաքրքրությունների համատեքստում դրանց նշանակության առումով:
