ԱԺ «Հայաստան» խմբակցության ղեկավար Սեյրան Օհանյանը հանդես է եկել հայտարարությամբ՝ կոչ անելով ընդդիմադիր պատգամավորներին չմասնակցել ԱԺ նիստին, որտեղ քննարկվելու է իր և Արմեն Չարչյանի նկատմամբ քրեական հետապնդում հարուցելու մասին միջնորդությունները։
«Մեր դեմ հարուցված միջնորդությունների վերաբերյալ վաղեմության ժամկետի տարբեր առաջարկներ են եղել: Եթե ես և պրոֆեսոր Չարչյանը ստորագրեինք դրանք, այդ միջնորդությունները չէին լինի: Սակայն մենք չենք համաձայնել, որովհետև վստահ ենք մեզ վրա՝ մենք հանցանք չենք գործել, ներկայացված որևէ գործարքում որևէ մեկի հետ հանցավոր համաձայնությունների մեջ չենք եղել: Շուտով հանրությունն էլ կհամոզվի դրանում»,- ասված է նրա հայտարարության մեջ։
Օհանյանը պնդել է՝ պատգամավորական մանդատն իր կյանքի բարձրագույն տիտղոսը կամ գերնպատակը չի եղել, և այն վայր դնելը ամենահեշտը կլիներ իր համար, մանավանդ, որ վախենալու պատճառ չունի․ «Սակայն մեզ մանդատ տվել է ժողովուրդը, և սպիտակ թելով կարած այդ գործերի շինծու, պատվիրված լինելը մենք կապացուցենք հենց ժողովրդի հետ ուղիղ խոսելով, ոչ թե իշխանության առաջ։ Ուզում են մեզ պատգամավորական անձեռմխելիությունից զրկե՞լ, թող զրկեն։ Մենք քննությունից չենք խուսափում։ Թող համարեն՝ ես և պրոֆեսոր Չարչյանը կողմ ենք քվեարկում քրեական հետապնդում սկսելու որոշմանը՝ ամբողջությամբ կեղծ որակելով միջնորդագրերում ներկայացված հիմնավորումները»։
Սեյրան Օհանյանը նաև կոչ է արել «Հայաստան», «Պատիվ ունեմ» խմբակցությունների պատգամավորներին՝ չմասնակցել «իշխանության էժանագին ներկայացմանը»․ «Թող անեն իրենց շոուն առանց մեզ։ Ես հաղթանակած բանակի գեներալ եմ։ Բանակը քանդողները չեն կարող ինձ մեղադրել»։
Հետևեք մեզ Telegram-ում
