Հակաթուրքական սադրանքներ կազմակերպելով՝ ահաբեկչական կառույցները «ականապատում են» հատկապես Ստոկհոլմի ճանապարհը դեպի ՆԱՏՕ։ Այս մասին հայտարարել է Թուրքիայի արտգործնախարար Մևլութ Չավուշօղլուն՝ մեկնաբանելով Անկարայի դիրքորոշումը Հյուսիսատլանտյան դաշինքին Շվեդիայի և Ֆինլանդիայի անդամակցության վերաբերյալ, փոխանցում է Անադոլու գործակալությունը։
Թուրք նախարարի խոսքով՝ Շվեդիան «կանխամտածված քայլ է անում ականների վրայով», թեև ցանկության դեպքում կարող է «մաքրել ճանապարհը»։
«Մենք չենք կարող «պարգևատրել» նրանց, ովքեր չեն կատարում իրենց խոստումը։ Ստոկհոլմի ստանձնած պարտավորությունները կատարելուց հետո Անկարան պատրաստ կլինի քննարկել այդ հարցը։ Սակայն ստեղծված իրավիճակում Թուրքիան չի կարող «այո» ասել Շվեդիայի՝ ՆԱՏՕ-ին անդամակցելուն»,- ընդգծել է նա։
Թուրք նախարարը հիշեցրել է, որ ի պատասխան Շվեդիայում հակաթուրքական և հակաիսլամական սադրանքների՝ Անկարան չեղարկել է Շվեդիայի և Ֆինլանդիայի անդամակցության գործընթացի եռակողմ մեխանիզմի երրորդ հանդիպումը, որը նախատեսված էր անցկացնել Բրյուսելում։
