«Առաջին լրատվական»-ի զրուցակիցն է վրաց քաղաքագետ Գելա Վասաձեն։
-Ուկրաինայի նախագահ Վոլդիմիր Զելենսկին աննախադեպ կոշտ հայտարարություն է արել Վրաստանի հասցեին։ «Ես չեմ քննարկում այն հարցը, թե ինչու է ձերբակալվել Վրաստանի նախկին նախագահը, ի՞նչ հետևանքներ կարող է ունենալ դա Վրաստանի քաղաքականության և ժողովրդավարության համար։ Սա նրանց ներքին հարցն է։ Խոսքս Ուկրաինայի քաղաքացի Միխեիլ Սաակաշվիլիի ձերբակալության մասին է, ով ամեն օր հրապարակային խոշտանգումների է ենթարկվում։ Կարծում եմ, որ նրանց նպատակը նրան սպանելն է»,- ասել է ուկրաինացի առաջնորդը։ Ինչպե՞ս եք գնահատում նման հայտարարությունը այս փուլում, ի՞նչ ազդեցություն կունենա Ուկրաինայի նախագահի կոշտ հռետորաբանությունը երկկողմ հարաբերությունների վրա։
-Չեմ կարծում, որ այսօր խոսքերն են փչացնում Ուկրաինայի և Վրաստանի հարաբերությունները։ Իսկ Զելենսկու խոսքերն արտացոլում են օբյեկտիվ իրականությունը՝ Սահակաշվիլիին սպանում են։ Մնացածը գեղարվեստական ժանրից է։
-Ընդհանրապես վրաց-ուկրաինական հարաբերությունները, որքան էլ տարօրինակ է, մերձենալու փոխարեն պատերազմի այս շրջանում ավելի սրվեցին։ Տարօրինակ է, քանի որ թվում է, թե երկու հետխորհրդային երկրներ դարձել են Ռուսաստանի ագրեսիվ քաղաքականության ու ինտերվենցիայի զոհը։ Ինչու՞ անհնար է երկկողմ հարաբերություններ հաստատել։
-Ոչ մի տարօրինակ բան չկա, վրացական իշխանություններն առավելագույնս օգտագործում են բնակչության վախը պատերազմի հանդեպ՝ իրենց ժողովրդականությունը մեծացնելու համար, ինչը նրանք բավականին լավ են անում։ Գումարած, իհարկե, փող են աշխատում Ռուսաստանի Դաշնությունում ու լավ փող են աշխատում։ Սրան գումարեք Սահակաշվիլիի հետ կապված իրավիճակի ներքաղաքական կողմն ու ամբողջական պատկերացում կազմեք։
– Ռուսաստանը պետք է հրաժարվի Վրաստանի տարածքի իր գրեթե 15-ամյա օկուպացիայից՝ որպես խաղաղ համաձայնագրի մաս՝ դադարեցնելու Կրեմլի պատերազմն Ուկրաինայում»,- ասել է Վրաստանի նախագահ Սալոմե Զուրաբիշվիլին։ «Բանակցային սեղանի շուրջ», որպեսզի ոչ ոք չմտածեր, որ ուկրաինական ճգնաժամը կարող է լուծվել «առանց Ռուսաստանի նահանջի բոլոր գրավյալ տարածքներից, այդ թվում՝ Աբխազիայից և Հարավային Օսիայից»։ Ուկրաինայի Ազգային անվտանգության ծառայության պետ Ալեքսեյ Դանիլովի խոսքերով՝ Վրաստանը փորձում է «սեփականաշնորհել մեր հաղթանակը»՝ առանց դրանում սեփական ներդրում ունենալու, ի՞նչ կարծիքի եք այս հայտարարության մասին:
-Դանիլովը պատերազմող երկրի ղեկավարներից է, և ես չէի ցանկանա կարծիք հայտնել, թե ինչ եմ մտածում այս արտահայտության մասին Ուկրաինայից որևէ մեկի հետ երկխոսությունից դուրս։ Ուստի այս հայտարարությունը կթողնեմ առանց մեկնաբանության։
