Համացանցում տարածվել է տեսանյութ, որն արվել է գաղտնի՝ ՌԴ զինկոմիսարիատներից մեկում: Տեսանյութում պատկերված է, թե ինչպես են զինկոմիսարիատում ստիպում, որ ՀՀ քաղաքացին, որը չի հանդիսանում ՌԴ քաղաքացի, մեկնի պատերազմ: «Ընտանիքով եկել եք, աշխատատեղեր եք զբաղեցնում, իսկ հենց պետությունը ձեր կարիքն ունի, փախչում եք: Ձեզնից ի՞նչ տղամարդ»,- ասում է զինկոմիսարիատի աշխատակիցը: Տղամարդը հակադարձում է, որ ինքը ՌԴ քաղաքացի չէ, սակայն ստանում է հետևյալ պատասխանը. «Ի՞նչ կապ ունի, դուք այստեղ եք ապրում, ձեր կինն ու երեխաներն այստեղ են, ուրեմն գրեթե քաղաքացի եք»: Տղամարդուն նաև սպառնում են, որ հրաժարվելու դեպքում կվարվեն օրենքի ողջ խստությամբ։ Թեմայի շուրջ «Առաջին լրատվական»-ը զրուցել է «Հայկական Կարիտաս» բարեսիրական ՀԿ-ի միգրացիոն ծրագրի փորձագետ Տաթևիկ Բեժանյանի հետ:
Բեժանյանի խոսքով` ՀՀ քաղաքացիները, որոնք գտնվում են ՌԴ տարածքում, իրավունք չկա նրանց նկատմամբ ճնշումներ գործադրել. «ՌԴ-ում ՀՀ դեսպանությունը պարտավոր է պաշտպանել մեր քաղաքացիներին, մինչև նրանք վերադառնան Հայաստան: Ռազմաճակատ մեկնելուց խուսափելու համար ՌԴ-ում ՀՀ քաղաքացիներին կոչ եմ անում վերադառնալ շտապ վերադառնալ հայաստան: ՌԴ-ն փորձում է իր ագրեսիվ պատերազմական գործողություններում ներքաշել այլ պետությունների քաղաքացիներին»:
