Ինչպես աշխարհի շատ երկրներում, Հայաստանում ևս նկատվում է ուռուցքային հիվանդությունների աճի ու դրանց երիտասարդացման միտում: «Արմենպրես»-ի մամուլի սրահում հրավիրված ասուլիսում ՀՀ ԱՆ Վ.Ա. Ֆանարջյանի անվան ուռուցքաբանության ազգային կենտրոնի փոխտնօրեն, ուռուցքաբան- վիրաբույժ Արթուր Ավետիսյանը նշեց, որ Հայաստանում կանանց շրջանում ամենատարածվածը կրծքագեղձի քաղցկեղն է, տղամարդկանց շրջանում՝ թոքի: Երկու դեպքում էր տարեկան 1300-ից ավելի նոր դեպք է գրանցվում:
«Հիվանդությունների աճը պայմանավորված է տարբեր գործոններով. կյանքի տեմպն է փոխվել, խնդիր է դարձել սննդի որակը, կյանքի տևողությունն է երկարել: Ինչ վերաբերում է բուժառուների կողմից ավելի հաճախ մասնագետներին դիմելուն, կանխարգելիչ ստուգումներ անելուն, ապա նախորդ տարիների համեմատ որոշակի ակտիվություն կա, սակայն այդ տեսանկյունից դիմելիության ցուցանիշները գոհացնող չեն»,-ասաց մասնագետը:
Նա իր մտահոգությունը հայտնեց այն առնչությամբ, որ շատ են դեպքերը, երբ բուժառուն դիմում է ուշացած, հիվանդության բարդ փուլում: Ըստ մասնագետի՝ շատերը, պատկերավոր ասած, արյունահոսող վերքերով են գնում բժշկի:
«Հաճախ կանայք ամեն շաբաթ գրանցվում են մատնահարդարի մոտ: Ու այդպես ամբողջ տարի: Երբ հարցնես, թե վերջին անգամ երբ ես ստուգվել բժշկի մոտ, պատասխանը չի կարողանա տալ: Ավելին, բորբոքված կարող են ասել, որ դա վճարովի է: Նախ, չեմ կարծում, որ մատնահարդարի մոտ գնալն անվճար է, երկրորդն էլ՝ բազմաթիվ անվճար հետազոտման ծրագրեր կան»,-ասաց Արթուր Ավետիսյանը:
Մասնագետը հորդորեց հետևել տեղեկատվությանը, իրազեկվել անվճար սկրինինգային ծրագրերի, ժամանակ առ ժամանակ անցկացվող իրազեկման արշավների մասին և հետազոտվել, ստուգվել: Արթուր Ավետիսյանը հիշեցրեց՝ հիվանդության վաղ հայտնաբերումը շատ կարևոր է բուժման բարձր արդյունք ունենալու համար:
