«GALLUP International Association»-ը Լաչինի վերաբերյալ հարցումներ է իրականացրել, ըստ որի՝ հետազոտության ժամանակ արված առաջին հարցին՝ ո՞վ կամ ովքե՞ր են մեղավոր Լաչինի միջանցքի արգելափակման համար, 42․5%-ը նշել է Ադրբեջանի իշխանությունները, 30%-ը նշել է Ռուսաստանի իշխանությունները, 29% –ը՝ ՀՀ իշխանություններ, 17․2%-ը՝ Թուրքիայի իշխանությունները, 12%-ը՝ ռուս խաղաղապահները, 9․8%-ը՝ բոլոր պետությունները, 8․3%-ը՝ Արցախի իշխանությունները, 4․5%-ը դժվարացել է պատասխանել այդ հարցին։
Այս առնչությամբ «Առաջին լրատվական»-ի հետ զրույցում ՔԺԿ նախագահ, քաղաքագետ Լևոն Շիրինյանն ասաց. «Նախ՝ հասարակությունը Ռուսաստանն ու Ադրբեջանը գրեթե հավասար են նշել, որովհետև երկուսը համատեղ են փակել միջանցքը։ Լաչինի միջանցքի աշխատելու պատասխանատվությունը ոչ թե Ադրբեջանինն է, այլ Ռուսաստանինը։ Նոյեմբերի 9-ի փաստաթղթով ամբողջ իրավասությունը և պատասխանատվությունը Ռուսաստանինն է։ Արցախցիների համար սա ողբերգություն է, բայց Հայաստանն այստեղ ոչ մի կապ չունի: իսկ Հայաստանի մասով ստացված թվերը հինգերորդ շարասյան և Մոսկվայի քարոզչության արդյունքն է, սա ռևանշիստների համակիրների արդյունքն է, իսկ մի մասն էլ ընդհանրապես անտեղյակ են ամեն ինչից»:
Հաջորդ հարցը եղել է հետևյալը՝ գնահատել Արցախի իշխանությունների գործունեությունը ստեղծված իրավիճակում, մասնավորապես նշված էր Արայիկ Հարությունյանի ու Ռուբեն Վարդանյանի անունները։ Արայիկ Հարությունյանը 5 բալային սանդղակում ստացել է 2․2 բալ, Ռուբեն Վարդանյանը՝ 3․7։
Լևոն Շիրինյանի համար խիստ տարօրինակ է Արայիկ Հարությունյանի հետ քաշվելը և Ռուբեն Վարդանյանի առաջ գալը. «Ռուբեն Վարդանյանը մեկ տարի առաջ անգամ Արցախի տեղը չգիտեր քարտեզի վրա։ Նա գիշեր-ցերեկ էկրանին է և Արցախի հարցերով զբաղվում է բացառապես Ռուսաստանի շահերից ելնելով: Նա հայկական շահեր չի սպասարկում, և այն, որ հայ է, դա ոչ մի բան չի նշանակում, սա խաբկանքի նման բան է։ Նա հավանաբար ուզում է Հայաստանի վարչապետ դառնալ, նրան հավանաբար ասել են՝ գնա Արցախ, ոնց ասենք էդպես կանես, հետո կգնաս Հայաստանի վարչապետ, բայց նման բան անհնար է։ Ինքը կենտրոնանում է Հայաստանի վրա»,-ընդգծեց քաղաքական գործիչը:
Հարցման մասնակիցներին նաև հարց էր ուղղվել՝ ինչպե՞ս եք վերաբերում ռուս խաղաղապահների տեղակայմանը Արցախում: Նոյեմբերի դրությամբ լիովին դրական է վերաբերում հարցվածների 37․7%-ը, հունվարի դրությամբ նվազում կա՝ 18․3%-ը, ընդհանրապես բացասական՝ նոյեմբերի դրությամբ՝ 5․8%-ը, հունվարի դրությամբ՝ 29․6%-ը։
Լևոն Շիրինյանը սա օրինաչափ է համարում. «Լաչինի միջանցքը փակողը ռուս խաղաղապահն է, քնքուշ խաղաղապահը, այսինքն՝ ռուսական մանիպուլյացիոն զորքեր են, որոնց գործունեությունն ուղղված է Հայաստանի դեմ։ Գլխավոր դերակատարը Հայաստանի դեմ Թուրքիան չէ, Ռուսաստանն է։ Աբսուրդ է՝ ՀՀ իշխանություններին այս հարցում մեղադրելը։ Հայաստանի իշխանությունը ինչպես կարող է ժողովրդի դեմ գործել: Ղարաբաղյան կլանն է այս բոլոր ողբերգության պատասխանատուն իր բոլոր նախագահներով։ Դրա համար էլ սկսվել են, ձեն-ձուն չեն հանում։ Արցախահայությունը իրենց մասին ընդհանրապես չի խոսում, և դա շատ վատ է»,-ընդգծեց նա:
