Հայաստանի վարչապետի նախաձեռնությամբ տեղի է ունեցել Փաշինյան-Պուտին հեռախոսազրույց, որի ընթացքում քննարկվել է իրավիճակը Լաչինի միջանցքի շուրջ, ինչպես նաև հայ-ադրբեջանական հակամարտության կարգավորման եռակողմ հայտարարությունների կատարման հարցը:
Հաղորդագրություններում նշվում է, որ խոսվել է նաև երկկողմ հարաբերության հրատապ հարցերի մասին: Հայաստանի կառավարության տարածած հաղորդագրությունը տարբերվում է նրանով, որ Լաչինի միջանցքի առնչությամբ նշվում է, որ Հայաստանի վարչապետը կարևոր է համարել միջանցքի ապարգելափակման ուղղությամբ Ռուսաստանի դաշնության քայլերի իրականացումը:
Կրեմլի հաղորդագրությունն այդ մասին լուռ է: Հաղորդագրություններն իհարկե առնվազն այս դեպքում մասնակի են արտացոլում հեռախոսազրույցի թե մոտիվը, թե բովանդակությունը, որովհետև բոլորովին պետք չէ բացառել, որ Հայաստանի վարչապետի հեռախոսազանգը Մոսկվա պայմանավորված է ավելի շուտ այն իրադարձություններով, որ ծավալվել են Իրանի շուրջ, որոնք անկասկած բարձրացրել են ռեգիոնալ տագնապն ու առնվազն առաջացրել հարցեր, որոնց պատասխանը գուցե Երևանը փորձել է ստանալ Մոսկվայից: Հնարավոր է, որ Լաչինի միջանցքի և ընդհանրապես հայ-ադրբեջանական հակամարտության կարգավորման եռակողմ հայտարարությունների թեման շոշափվել է հենց այդ ՝ նոր իրողությունների կամ Իրանի շուրջ ինտենսիվացած զարգացումների համատեքստում, որոնք անկասկած չեն կարող իրենց ազդեցությունը չթողնել իրավիճակի վրա: Հատկապես, որ այդ իրադարձությունները ծավալվում են Ռուսաստանի և Իրանի միջև սերտ գործակցության և փաստացի դաշնակցային հարաբերության ծավալման, ու նաև այդ առումով ԱՄՆ-ից հնչող մտահոգությունների ֆոնին:
Միևնույն ժամանակ, ուշադրությունից պետք չէ բաց թողնել և այն, որ հեռախոսազանգը, այսինքն հայ-ռուսական բարձր մակարդակի շփումը տեղի է ունենում Եգիպտոսի նախագահ Ավդել Ֆաթթահ Ալ-Սիսիի ռեգիոնալ այցից հետո, որը եղել էր Հնդկաստանում, այնուհետև այցելել Բաքու և ավարտել այցը Երևանում: Ընդ որում, Երևանում նա խոսել էր այն մասին, որ պատրաստ է լինել հայ-ադրբեջանական արցախյան հակամարտության միջնորդ, ընդգծելով, որ Եգիպտոսը այդ հարցում դրսևորում է չեզոքություն: Պետք չէ բացառել, որ Փաշինյանը Պուտինի հետ քննարկել է Եգիպտոսի այդ պատրաստակամությանն ու հնարավոր դերին առնչվող հարցեր, նաև հաշվի առնելով այն, որ Արևմուտքի հետ աշխատող Կահիրեն նաև շարունակում է հարաբերությունը Ռուսաստանի հետ: Ի դեպ, դեկտեմբերի 31-ին Եգիպտոսի արտգործնախարարը ժամանել է Մոսկվա, իսկ հունվարի 29-ին Կահիրեում էր ԱՄՆ պետքարտուղար Բլինքենը, որը հանդիպել էր նաև Կովկասից վերադարձած նախագահ Սիսիին:
