Երուսաղեմում հայերի և ծայրահեղ հրեաների միջև բախումները վերջին երեք ամիսներին ինտենսիվացել են։ Շաբաթ օրը՝ հունվարի 28-ին, երեկոյան մի խումբ ծայրահեղ հրեաներ փորձել են պատրիարքարանի դրոշը վայր իջեցնել և ծեծկռտուք է եղել հայ երիտասարդների և ծայրահեղական հրեաների վրա։
Դեպքի ժամանակ ոստիկաններ են եկել, որոնք շատ կոշտ են վարվել հայ երիտասարդների հետ, ուժեղ հարվածներ են հասցրել նրանց եւ բերման ենթարկել: Հայ երիտասարդներից մեկին պահել են ոստիկանությունում մեկ օր եւ միայն կիրակի է ազատ արձակել, այն էլ այն բանից հետո, երբ Հայոց պատրիարքարանը որոշակի ճնշում է գործադրել եւ ստիպել ոստիկանությունն ավելի օբյեկտիվ լինել:
Նկատենք, որ հատկապես վերջին երկու-երեք ամիսներին շատ են լինում այսպիսի բախումներ: Երուսաղեմում «Առաջին լրատվական»-ի աղբյուրը նշեց. «Ընտրվել է աջակողմյան կառավարություն, որոնք փոքրամասնությունների դեմ են, ծայրահեղ հրեա երիտասարդներին աջակցում են, մշտական մտայնություն կա, որ փոքրամասնությունների դեմ բախումներ տեղի ունենան։ Պատրիարքարանի պատերին գրել են՝ «մահ քրիստոնյաներին»։
Ծայրահեղականները գոռացել են՝ դուք այստեղ թաղամաս չունե՛ք: Սա մե՛ր երկիրն է, գնացեք մեր երկրից։ Եվ երբ հայ երիտասարդները ասել են. «Սա նաև մե՛ր երկիրն է, մեր տունը այստե՛ղ է, մենք այստե՛ղ ենք ծնվել, ուրիշ տեղ չունենք գնալու», մյուս ծայրայեղականը արցունքաբեր գազ է փչել հայ երիտասարդի աչքերին եւ երկուսով փախուստի են դիմել:
Հուսանք, որ ոստիկանությունը պետք է քննի այս հարձակումը, պետք է քայլեր ձեռնարկի հրեա ծայրահեղականների դեմ, որ հետագայում նման դեպքեր տեղի չունենան։ Պատրիարքությունը, ամենայն հավանականությամբ, ոստիկանությանը իր բողոքը կներկայացնի»:
Ավելի ուշ ոստիկանները հայտնաբերել են երկու հրեա ծայրահեղականներին և ձերբակալել նրանց:
Այս դեպքի առնչությամբ, Երուսաղեմի Հայոց պատրիարքարանի դիվանապետ Հայր Աղան Գոգչյանն «Առաջին լրատվական»-ի հետ զրույցում նշեց, որ ոստիկանները պետք է այսօր հանդիպեն պատրիարքին։ Նա նշեց, որ իրավիճակն այս պահին լարված է. «արաբների և հրեաների միջև է լարվածությունը, որը մեզ հետ որևէ կապ չունի»,-ասաց Հայր Աղան Գոգչյանը:
