Թուրքիայի նախագահ Ռեջեփ Թայիփ Էրդողանը, նախօրեին հեռուստաելույթ ունենալով, նշել է, որ Թուրքիան կարող է իր համաձայնությունը տալ ՆԱՏՕ-ին Ֆինլանդիայի անդամակցությանը։ Այս հայտարարությունը հնչել է այն համատեքստում, երբ Շվեդիայի դեպքում Թուրքիան լուրջ խնդիրներ է ստեղծում և անգամ հրաժարվում աջակցել ՆԱՏՕ-ի ընդլայնմանը Սկանդինավյան թերակղզու ամբողջական տարածքով։
Էրդողանը ակնարկել է, որ կարող են մի նամակ հղել Ֆինլանդիային ու անակնկալի բերել Շվեդիային։ Դրանով հանդերձ՝ Թուրքիայի նախագահը զգուշացրել է Ֆինլանդիային նույն սխալը թույլ չտալ, ինչ Շվեդիան։ Նա նաև հավելել է, որ Շվեդիային տրվել էր 120 հոգանոց ահաբեկիչների ցուցակ, որոնց պետք է արտահանձնեին։ Նա կրկին հիշեցրել է այդ պայմանը և ակնարկել, որ առանց արտահանձնման, ՆԱՏՕ-ի անդամակցության համաձայնություն դժվար թե լինի։
