Հունվարի 28-ն ինձ համար, որպես պաշտպանության նախարար, ոչ միայն բանակի տոնն է, այլ նախորդ տարի կատարված աշխատանքի, արված-չարվածի գնահատականի օրն է: Այն մի կարևոր փուլ է, երբ ամենքս մեզ հարց տալուց պիտի վստահ լինենք, որ մեր պարտականություններում թերանալիս անգամ՝ մեղավորության բաժին չենք ունեցել: Այդ մասին Հայոց բանակի կազմավորման 31-րդ տարեդարձի առթիվ
ՊՆ-ում կայացած խորհրդակցության ժամանակ իր ելույթում շեշտել է ՀՀ պաշտպանության նախարար Սուրեն Պապիկյանը։
Նախքան Հայոց բանակում տեղի ունեցած իրադարձություններին հետահայաց անդրադառնալը՝ Պապիկյանը ցավակցել է հունվարի 19-ին N զորամասի կացարանում բռնկված հրդեհի հետևանքով զոհված 15 զինծառայողների հարազատներին և նշել․ «Հայաստանի զինված ուժերում անտարբերությունը, խնդրիրներին մատերի արանքով նայելը և անկարգապահությունը տեղ ունենալ չեն կարող: Դա այլևս աններելի է, և յուրաքանչյուրիս անելիքն է հետևություններ անել այս իրադարձություններից, խմբագրել մեր անելիքները և կատարել մեր պարտականությունները»։
Պաշտպանության նախարարը նաև անդրադարձ է կատարել 2022 թվականի սեպտեմբերյան ռազմական գործողություններին։
«Մենք 2022 թվականի սեպտեմբերին, նաև 2020 թվականի պատերազմից հետո, ցույց տվեցինք, որ հայ զինվորը, ԶՈՒ-ն կանգնած է մեր սահմանին և ամեն գնով պաշտպանելու է ՀՀ տարածքային ամբողջականությունը: Սա, իհարկե, առաջին քայլն է, առաջին նշույլն է առ այն, որ մեր ողնաշարը շտկման ճանապարհին է: Բայց նաև այն բավարար չէ, և 2023 թվականը ինձ համար՝ որպես պաշտպանության նախարար, ձեր առաջ պարտավորության ստանձնումն է, որ 2023-ը պետք է դառնա սխալների խմբագրման, անհնարինը իրականություն դարձնելով՝ մեր ողնաշարը շտկելու տարի»,-շեշտել է Պապիկյանը: