Սեպտեմբերի 2-ին Կ.Դեմիրճյանի անվ. մարզահամերգային համալիրում կայացավ Հայաստանի համար աննախադեպ` պրոֆեսիոնալ բոքսի երեկո` «Հայաստանն ընդդեմ աշխարհի»: Համալիրի լեփ-լեցուն դահլիճը ականատես եղավ 4 գեղեցիկ մարտի. բոլոր 4 մենամարտերն էլ ավարտվեցին հայ բռնցքամարտիկների հաղթանակով:
Նախ մինչև 60 կգ քաշային կարգում Հովհաննես Ժամկոչյանը երկրորդ ռաունդում նոկաուտի ենթարկեց Վրաստանի ներկայացուցիչ Միխայիլ Գոգաշվիլուն: Ապա Ազատ Հովհաննիսյանը նույնպես երկրորդ ռաունդում նոկաուտի ենթարկեց Էստոնիայի դրոշի ներքո հանդես եկող Սերգեյ Կասիմովին:
Գաբրիել Դոլմաջյան-Եվգենի Ֆյոդորով մենամարտն ավելի բարդ ստացվեց: Հայ բռնցքամարտիկը միավորներով հաղթեց լատվիացուն: Բոլոր երեք մրցավարները միևնույն` 60-54 հաշվով հաղթանակը շնորհեցին մեր բռնցքամարտիկին:
Վերջում տեղի ունեցավ երեկոյի կարևորագույն մրցամարտը` IBO տարբերակով աշխարհի չեմպիոնական գոտու համար, որը վիճարկեցին գործող չեմպիոն, Հայաստանը ներկայացնող Վիկ Դարչինյանը և Էվանս Մբամբան` ՀԱՀ-ից:
Վիկն ակնհայտ գերազանցում էր հարավաֆիրկացուն` թե՛ արագությամբ, թե՛ տեխնիկայով: Տպավորությունն այնպիսին էր, որ Մբամբայի գերխնդիրը նոկաուտի չենթարկվել էր, ինչը դիմացկուն հարավաֆրիկացուն հաջողվեց: Ինչպես արդեն տեղեկացրել ենք, երեք կողային մրցավարներն էլ հաղթանակը շնորհեցին վանաձորցի բռնցքամարտիկին` 119-107, 120-107, 120-107:
Այժմ անդրադառնանք ռինգից դուրս կատարվածին: Հայ հանդիսատեսը պարզապես հրաշալի դրսևորեց իրեն` առաջին իսկ մարտի մեկնարկային ռաունդից բուռն, բայց կարգապահ աջակցելով մեր մարզիկներին: Իհարկե, գնալով մթնոլորտն ավելի էր թեժանում, բղավոցներն ու վանկարկումները` բարձրանում: Իսկ Դարչինյան-Մբամբա մարտի ժամանակ հանդիսատեսը ոչ մի վայրկյան չլռեց «սատկացրու», «հաղթանակ», «նոկաուտ», «Վիկ», «ցուլ» և այլ վանկարկումները լսելի էին ամբողջ 12 ռաունդների ընթացքում:
Երեկոյին ներկա էր նաև Սերժ Սարգսյանը, ում անունը հաղորդավարները առիթը բաց չէին թողնում հնչեցնել: Սակայն այն, ինչ արեց Վախթանգ Դարչինյանը, մեծամասնության համար անակնկալ էր. երկար շնորհակալական խոսք ասելուց, հանդիսատեսից ներողություն խնդրելուց (մրցակցին նոկաուտի չենթարկելու համար) և բազմաթիվ շնորհավորանքների արժանանալուց հետո նա բարձրացավ օթյակ ու գոտին հանձնեց Սերժ Սարգսյանին: Հրաշալի երեկոյի ցուցադրական ավարտ:
