«Հայաստան» համահայկական հիմնադրամը Լաչինի միջանցքի շրջափակման հետևանքով առաջացած հումանիտար ճգնաժամը մեղմելու նպատակով, առաջին փուլով, 100 տոննա պարենային մթերք է նվիրաբերել ՀՀ–ում Արցախի Հանրապետության մշտական ներկայացուցչությանը: Հիմնադրամից տեղեկացնում են, որ հաջորդիվ օգնությունը կլինի առաջին անհրաժեշտության դեղորայքի տեսքով:
2021-2022թթ․ «Հայաստան» հիմնադրամն Արցախում իրականացրել է ավելի քան 32 միլիարդ դրամի բազմոլորտ ծրագրեր՝ ուղղված հետպատերազմյա շրջանի հաղթահարմանը։
Եվ հիմա արցախցիները և հայաստանցիները պահանջում են հաշվետվություն։ Արցախցիներից մեկը ֆեյսբուք սոցիալական ցանցում գրել է․ «Ես այդ օգնությունները կրող մի մասնիկն եմ, ձեզ խնդրում և պահանջում եմ՝ ներկայացնել մանրակրկիտ հաշվետվություն, որպեսզի երբ երեսովս տան, որ օգնել են ինձ, ես հասկանամ, թե ինչ օգնություն է եղել դա, իսկ միգուցե ես հրաժարվելու եմ այդ օգնությունից։ Դրա համար հստակեցրեք։ Հարգելի՛ պատգամավորներ, կարծում եմ, ամենից առաջ դուք պետք է հաշվետվություն պահանջեք՝ ձեզ ընտրողների շահերը պաշտպանելու առաքելությամբ»։
Մինչ արցախցիները, հայաստանցիները պահանջում են մանրակրկիտ հաշվետվություն, Արցախի պատգամավորներից կան, որ անգամ տեղյակ չեն օգնությունից, նման պահանջներից։ Արցախի Արտադրության և արտադրական ենթակառուցվածքների հարցերի մշտական հանձնաժողովի անդամ Դավիթ Սարգսյանն «Առաջին լրատվական»-ի հետ զրույցում նշեց․ «Տեղյակ չեմ այդ պատմությունից, լավ կլինի հանձնաժողովի նախագահից հարցնեք»։
ԱԺ նախագահ Արթուր Թովմասյանը «Առաջին լրատվական»-ի հետ զրույցում նշեց, որ տեղյակ չէ ինչպես է բաշխվելու, բայց վստահ է, որ ազնիվ է բաշխվելու։
«Նման խնդիր չկա, բոլորս միասին քննարկում ենք, որ ինչ-որ կերպ այս վիճակից դուրս պետք է գանք»,-ասաց Արթուր Թովմասյանը։ Արցախի ԱԺ նախագահը վստահեցրեց, որ բաշխումը լինելու է արդարության սկզբունքով և հավասար։ Նա նաև տեղեկացրեց, որ մինչև հունվարի 25-ը հստակ կարգ կմշակվի․
«Նախագահի գլխավորությամբ՝ կառավարությունը, ԱԺ-ն քննարկումներ են անում։ Արդարության առաջին գրավականն էլ ներդրված կտրոններն են, որ բոլորին հասնի, ազնիվ է լինելու, դժգոհությունը հասարակության մեջ կքչանա։ Եթե առաջ 2000 խնդիր ունեինք, շրջափակումից հետո 20․000 խնդիր ունենք։ Ամսի 25-ից հետո ԱԺ պատգամավորներն օպերատիվ շտաբի անդամների հետ հերթական հանդիպումները կունենան, կհանդիպեն ժողովրդի հետ, տեղում բարձրացած հարցերին կծանոթանան։ Այս հանդիպումներին պետնախարարը ցանկություն է հայտնել ներկա լինել։ Արձանարենք՝ Արցախում բոլորս հավասար ենք՝ ժողովուրդն ու իշխանությունը»։
Հայաստանի Հանրապետությունում Արցախի Հանրապետության մշտական ներկայացուցչությունից «Առաջին լրատվական»-ին տեղեկացրին, որ «Հայաստան» համահայկական հիմնադրամի նվիրատվությունը դեռ չի հասել Արցախ։ Այն դեռևս Գորիսում է, և կարող է Արցախ հասնել կամ Կարմիր խաչի միջնորդությամբ, կամ ռուս խաղաղապահների։
«Արցախցին այսօր հասանելիություն չունի։ Նվիրաբերելը և տեղ հասնելը տարբեր բաներ են»,-ասացին Հայաստանի Հանրապետությունում Արցախի Հանրապետության մշտական ներկայացուցչությունից՝ հավելելով, որ 100 տոննան տեղ հասնելուց հետո Արցախի կառավարությունը հավասար բաշխում կիրականացնի։