Եվրոպայի մինչև 21 տարեկանների առաջնության ընտրական փուլի շրջանակներում Հայաստանի երիտասարդական հավաքականը 1-0 հաշվով առավելության հասավ Անդորրայի ընտրանու նկատմամբ: Հանդիպման միակ գոլը 85-րդ րոպեին հեղինակեց Վալտեր Պողոսյանը: Երեկ երկու երկրների ազգային հավաքականների մրցավեճում գրանցվել էր խոշոր` 3:0 հաշիվ` հօգուտ Հայաստանի:
Ինչպես հաղորդում է gol-bet.com կայքը, դա Հայաստանի երիտասարդական հավաքականի երկրորդ անընդմեջ հաղթանակն էր, որից հետո, մեր ընտրանին վեց միավորով շարունակում է գլխավորել ընտրական երրորդ խմբի մրցաշարային աղյուսակը:
Հայաստանի երիտասարդական հավաքականը հանդես եկավ հետևյալ կազմով.
Կարեն Իսրայելյան, Անդրանիկ Ոսկանյան, Վարազդատ Հարոյան, Հովհաններս Համբարձումյան, Կամո Հովհաննիսյան (Բենիկ Հովհաննիսյան 83′), Հովհաննես Հովհաննիսյան, Վալտեր Պողոսյան, Մասիս Ոսկանյան, Էդգար Մալաքյան, Արտակ Էդիգարյան (Դավիթ Սուջյան 65′), Գևորգ Կարապետյան (Գևորգ Բադալյան 77′):
Հիշեցնենք, որ հունիսի 7-ին Երևանում կայացած առաջին խաղում Հայաստանի երիտասարդական ընտրանին 4-1 հաշվով ջախջախել էր Մոնտենեգրոյի (Չեռնոգորիայի) հավաքականին:
