ԱՄՆ-ի Ինդիանա նահանգում նախկին փոխնախագահ Մայք Փենսի տանը հայտնաբերված 12 գաղտնի փաստաթղթերի թվում կան տեղեկատվական նշումներ, որոնք պատրաստվել Էին արտասահմանյան ուղևորությունների համար:
Այս մասին հաղորդում է CNN-ը՝ վկայակոչելով իրազեկ աղբյուրների: Լրատվամիջոցի զրուցակիցներից մեկի խոսքով՝ Փենսի մոտ հայտնաբերված որոշ փաստաթղթեր, հավանաբար, օգտագործվել են փոխնախագահին արտասահմանյան հանդիպումներին նախապատրաստելու համար։ Ըստ նրա՝ հնարավոր է, որ փաստաթղթերն ուշադրությունից դուրս էին մնացել փաթեթավորման գործընթացում, քանի որ դրանք լցրել են հին ճամփորդական թղթապանակների մեջ:
Ինչպես նշել են CNN-ի զրուցակիցները, նման գրառումները հաճախ պարունակում են հիմնական կենսագրական տեղեկություններ օտարերկրյա առաջնորդների մասին, սակայն երբեմն ավելի գաղտնի տեղեկատվություն են պարունակում։ Ամերիկացի պաշտոնյայի խոսքով՝ փաստաթղթերը գնահատելու համար Հետաքննությունների դաշնային բյուրոն (ՀԴԲ) համագործակցում է ԱՄՆ-ի հատուկ ծառայությունների հետ։ Գործընթացի նպատակն է պարզել, թե որքան թարմ է տեղեկատվությունը, դրա գաղտնիության աստիճանը և գաղտնի նյութերը չթույլատրված վայրում պահելու հնարավոր ռիսկերը: Իր հերթին, փաստաթղթերի բովանդակությանը ծանոթ մեկ այլ աղբյուր ասել է, որ թղթերում ոչ մի արտառոց բան չի եղել։
Նրա տվյալներով՝ հայտնաբերված փաստաթղթերի վրա չեն եղել SCI կամ SAP մակնշումները, որոնցով նշվում են ամենակարևոր գաղտնի նյութերը։ Ավելի վաղ հաղորդվել էր, որ ԱՄՆ նախկին փոխնախագահի փաստաբանը Ինդիանայում գտնվող նրա տանը հայտնաբերել Է մեկ տասնյակից ավելի գաղտնի փաստաթղթեր, որոնք փոխանցվել են ՀԴԲ-ին։ Ինչպես ավելի վաղ հայտնել էր «Արմենպրես»-ը, հունվարին հայտնի դարձավ, որ գաղտնի փաստաթղթերի խմբաքանակ են գտել Վաշինգտոնի Փենսիլվանիայի համալսարանում Բայդենի անվան դիվանագիտության և գլոբալ համագործակցության կենտրոնում:
Դրանք վերաբերում են այն ժամանակին, երբ Բայդենն զբաղեցնում էր ԱՄՆ փոխնախագահի պաշտոնը: Ավելի ուշ գաղտնի փաստաթղթեր են հայտնաբերվել նաև Բայդենի՝ Ուիլմինգթոնում գտնվող տանը: Նախկինում գաղտնի փաստաթղթերը ոչ պատշաճ կերպով պահելու մեջ մեղադրել են ԱՄՆ նախկին նախագահ Դոնալդ Թրամփին։
2022 թ. օգոստոսին գաղտնի փաստաթղթեր էին հայտնաբերվել Թրամփի Մար-ա-Լագոյի կալվածքում խուզարկության արդյունքում: Ամերիկացի հանրապետական ազդեցիկ օրենսդիրները Արդարադատության նախարարությանը մեղադրել են Բայդենի և Թրամփի նկատմամբ մոտեցումներում երկակի ստանդարտներ կիրառելու մեջ։ Նրանց ճնշմամբ ԱՄՆ գլխավոր դատախազ Մերրիկ Գարլանդը Բայդենին վերաբերող գործը հետաքննելու համար նշանակել Է հատուկ դատախազ Ռոբերտ Հուրին։
