2022 թվականին ճանապարհատրանսպորտային պատահարները տեսանելիորեն նվազել են։
Կառավարության հերթական նիստի ժամանակ Ներքին գործերի նախարար Վահե Ղազարյանը ներկայացրեց 2019 թվականից 2022 թվականի կտրվածքով ճանապարհատրանսպորտային պատահարների վիճակագրությունը։
«2019 թվականից 2022 թվականի կտրվածքով ճանապարհատրանսպորտային պատահարների, ինչպես նաև դրանց հետևանքով զոհերի և վիրավորների թիվն առավելապես նվազել է 2022 թվականին։
Այսպես, եթե 2019 թվականից մինչև 2021 թվականը (բացառությամբ համավարակի ժամանակահատվածի), ճանապարհատրանսպորտային պատահարների քանակը աճել է միջինը 15 տոկոսով, իսկ զոհերի՝ միջինը 4 տոկոսով, ապա 2022 թվականին արձանագրվել է ճանապարհատրանսպորտային պատահարների քանակի նվազում։ Մասնավորապես, 2019 թվականի համեմատությամբ 2022 թվականին ՃՏՊ-ների թիվը նվազել է 419-ով կամ 10,2 տոկոսով, վիրավորների թիվը նվազել է 646-ով կամ 9,5 տոկոսով, զոհերի թիվը նվազել է 20-ով կամ 5,9 տոկոսով։
Չնայած այն հանգամանքին, որ 2022 թվականի ընթացքում 22 հազար 825-ով կամ շուրջ 2 անգամ ավելացել է հաշվառված տրանսպորտային միջոցների թիվը, այդուհանդերձ, ձեռնարկված միջոցառումների արդյունքում 2021 թվականի համեմատությամբ 2022 թվականին 295-ով կամ 6,4 տոկոսով նվազել է ճանապարհատրանսպորտային պատահարների թիվը, ինչի արդյունքում 47-ով կամ 12,8 տոկոսով նվազել է զոհերի թիվը, 542-ով կամ 8,1 տոկոսով վիրավորների թիվը»,- ասաց Ղազարյանը։
Ներքին գործերի նախարարը նաև հայտնեց, որ 2019-21 թվականի կտրվածքով Հայաստանի Հանրապետության տրանսպորտային պարկը ավելացել է շուրջ 160 հազար տրանսպորտային միջոցներով կամ 23 տոկոսով։
Վարչապետ Նիկոլ Փաշինյանն իր հերթին ներկայացրեց, թե ինչ միջոցներ են ձեռնարկվել ավտովթարների թիվը նվազեցնելու ուղղությամբ։
«Առաջին հերթին ներդրվել է պարեկային ոստիկանությունը և տեսնում ենք, որ ճանապարհատրանսպորտային պատահարների նվազումների մեջ ամենամեծ տեղն ունի Երևանը, որտեղ առաջինն է գործարկվել պարեկային ոստիկանությունը։
Հաջորդը՝ Կառավարության նիստերում ճանապարհների կառուցման, նորոգման, հիմնանորոգման մասին խոսելիս, անդրադարձել ենք նաև «սև կետերի» վերացմանը։ Մենք վերլուծում ենք ճանապարհի այն հատվածները, որտեղ կրկնվում են վթարները և այդ հատվածներում լոգիստիկ տրամաբանությունը փոխում ենք։
Մյուսը ճանապարհային երթևեկության կանոնների ստանդարտների ներմուծումն է»,- ասաց Փաշինյանը։
