Ս․թ․ հունվարի 25-ին Հանուն Հանրապետության Կուսակցության պատվիրակությանը ՀՀ Պաշտպանության Նախարարությունում հյուրընկալեց Նախարար Սուրեն Պապիկյանը։
Պատվիրակության անդամներ՝ կուսակցության Նախագահ Արման Բաբաջանյանը, փոխնախագահ Ռուբեն Մեհրաբյանը, արտաքին հարաբերությունների քարտուղար Առնոլդ Բլեյանը եւ քաղաքական Խորհրդի անդամ, իրավական հարցերի պատասխանատու Արտաշես Խալաթյանը Նախարարի հետ հանդիպմանը վերահաստատեցին, որ Հանուն Հանրապետության կուսակցությունն իր բոլոր կառույցներով և կարողությամբ Հայոց բանակի, Հայկական զինված ուժերի կողքին է, բանակի արմատական բարեփոխումների աջակիցը:
Նախարարի հետ հանգամանալից զրույցի ընթացքում ներկայացրին կուսակցության քաղխորհրդի տեսակետները եւ մոտեցումները, կապված ՀՀ Զինված Ուժերում ընթացող համակարգային բարեփոխումների գործընթացի, պաշտպանական ոլորտում միջազգային համագործակցության, բանակում ընթացիկ իրավիճակի հետ, մասնավորապես, տեղի ունեցած՝ ոչ մարտական պայմաններում կորուստներով ուղեկցվող արտակարգ դեպքերի եւ պատահարների համատեքստում։
Հանդիպման ընթացքում կուսակցության պատվիրակությունն առանձնակի կարեւորեց ռազմական անվտանգության, ռազմա-տեխնիկական, ռազմա-իրավական, անձնակազմի հետ տարվող աշխատանքների, մարտական պատրաստության եւ այլ ոլորտներում անհետաձգելի արմատական բարեփոխումների, արդյունքի միտված համակարգային լուծումների հրատապ անհրաժեշտությունը՝ որպես Հայաստանի Հանրապետության բացարձակ առաջնահերթություն։
Նախարարին ներկայացվեց կուսակցության սկզբունքային դիրքորոշումը՝ խուսափել բանակում հապճեպ կադրային որոշումներից, նախապատվությունը տալով համապարփակ լուծումներին՝ բոլոր մակարդակներում ռազմական կրթության, կադրերի պատրաստման համակարգի, նորմատիվների, հրահանգների կանոնակարգերի եւ կանոնագրքերի փոփոխության հիման վրա, մարտական պատրաստության եւ զորքերի ծառայաության, մարտական տեխնիկայի եւ սպառազինության ոլորտներում՝ պաշտպանական ոլորտում համաշխարհային փորձի առաջատար՝ արեւմտյան չափորոշիչների ներդրմամբ եւ կիրառմամբ, ինչը ենթադրում է նոր պաշտպանական եւ անվտանգության քաղաքականություն, ռազմա-տեխնիկական համագործակցության աշխարհագրության վճռական փոփոխություններ։
Կարեւորվեց նաեւ պաշտպանական ոլորտի բարեփոխումների գործընթացում ժամանակակից ռազմավարական հաղորդակցությունների համակարգի ներդրման անհրաժեշտությունը։
Խիստ օգտակար համարելով անկեղծ եւ գործնական մթնոլորտում կայացած հանդիպումը, ձեռք բերվեց պայմանավորվածություն, որ որոշակի պարբերականությամբ շփումները շարունակվեն։
ՀԱՆՈՒՆ ՀԱՆՐԱՊԵՏՈՒԹՅԱՆ ԿՈՒՍԱԿՑՈՒԹՅՈՒՆ
ՄԱՄԼՈ ԾԱՌԱՅՈՒԹՅՈՒՆ