Օրերս Ելիսեյան պալատում Ֆրանսիայի նախագահ Էմանուել Մակրոնն ընդունել է Ֆրանսիայի հայկական կազմակերպությունների համակարգող խորհրդի (CCAF) համանախագահներ Արա Թորանյանին և Մուրադ Փափազյանին։
Ֆրանսիայի հայկական համայնքի ներկայացուցիչները քննարկել են դեկտեմբերի 12-ից Ադրբեջանի կողմից շրջափակման մեջ գտնվող Լեռնային Ղարաբաղում տիրող իրավիճակը։
Այսօր արդեն Ֆրանսիայում Հայաստանի պատվավոր հյուպատոս, ֆրանսիացի հայտնի ֆուտբոլիստ Յուրի Ջորկաեֆի եղբայրը՝ Դենիս Ջորկաեֆը, Ֆեյսբուքի իր էջում տեղեկացրել է, որ մի շարք հայամետ գործիչների մասնակցությամբ հանդիպել են Ֆրանսիայի նախագահ Էմանուել Մակրոնի հետ․ «Հայերի ողբերգության հանդեպ անտարբերությամբ պայմանավորված, որին ադրբեջանցիները սպառնում են էթնիկ զտումներով, երեկ Ելիսեյան պալատում տեղի է ունեցել հանդիպում նախագահ Էմանուել Մակրոնի և հայամետ գործիչների միջև (Յուրի Ջորկաեֆ, Ժան-Քրիստոֆ Բյուսոն, Սիլվեն Տեսսոն, Պասկալ Բրուքներ, Օլիվյե Վեբ, Ստեֆան Հասբանյան)»,- այս մասին ասվում է նրա գրառման մեջ։
«Առաջին լրատվական»-ի հետ զրույցում Արա Թորանյանը խոսել է Մակրոնի հետ հանդիպումից։ Հարցին՝որքանո՞վ Ֆրանսիան ավելի ակտիվ դեր կարող է խաղալ Արցախի բնակչության պաշտպանության գործում, Թորանյանը նշել է․
«Ֆրանսիան աշխարհի 5-րդ ամենամեծ երկիրն է։ Անվտանգության խորհրդի անդամ է։ Եվ այս առումով կարող է գործել բազմաթիվ ոլորտներում՝ օգնելու Հայաստանին և օգնության հասնելու Լեռնային Ղարաբաղի բնակչությանը։ Սենատն ու Ազգային ժողովը բանաձևեր են ընդունել՝ քննարկելու Ադրբեջանի դեմ պատժամիջոցները։ Դա Ալիևին հետ մղելու միջոց է։ Վերջինս ցանկանում է մեկուսացնել Լեռնային Ղարաբաղը, կտրել աշխարհից։ Մենք կարող ենք նաև գործել Ադրբեջանին միջազգային ասպարեզում մեկուսացնելու ուղղությամբ. տարբեր երկրների կողմից շրջափակման հետ կապված դատապարտումները, Եվրոպայի, Ֆրանսիայի և ԱՄՆ-ի դիրքորոշումները սկիզբ են»,-ասել է Թորանյանը։
Դիվանագիտության տեսանկյունից Ֆրանսիան պետք է ավելի ու ավելի առաջ գնա՝ հաստատելով թե՛ աջակցությունը Հայաստանի Հանրապետության տարածքային ամբողջականությանը, թե՛ անհապաղ մարդասիրական աջակցություն ցուցաբերելու Լեռնային Ղարաբաղի բնակչությանը։
«Մենք չենք կարող թույլ տալ, որ Արցախը սովամահ լինի: Ֆրանսիան միայնակ կամ ուրիշների հետ, պետք է մարդասիրական, քաղաքական և դիվանագիտական օգնություն ցուցաբերի այս բնակչությանը օգնելու համար։ Այս առաքելությունը պատկանում է ՄԱԿ-ի պաշտպանության կոնվենցիային, երբ բախվում ենք էթնիկ զտումների սպառնալիքների հետ, ինչն այդպես է»,-հավելել է Արա Թորանյանը։
