Ադրբեջանը շարունակում է ամենաբարձր մակարդակով ստեր տարածել՝ ասելով, թե իբր Լաչինի միջանցքը բաց է։ Այս մասին միջազգային կառույցներում ու հանդիպումներում հայտարարում են և՛ Ադրբեջանի նախագահ Իլհամ Ալիևը, և՛ նրանց ԱԳ նախարարը, և՛ այլ բարձրաստիճան ադրբեջանցի պաշտոնյաներ՝ փորձելով իրենց հանցավոր ու ցեղասպան քաղաքականությունը քողարկել եվրոպացի պաշտոնյաների առաջ։
Բայց իրականությունն այլ է. արդեն մեկուկես ամիս է՝ Լեռնային Ղարաբաղը Հայաստանին կապող կյանքի ճանապարհը շարունակում է փակ մնալ կեղծ «էկոակտիվտների» կողմից՝ զրկելով Լեռնային Ղարաբաղի հայերին բժշկվելու հնարավորությունից կամ էլ սեփական ընտանիքի անդամներին տեսնելուց։ Ինչքան էլ ադրբեջանցիները կեղծ պնդումներ տարածեն, ակնհայտ է, որ ճանապարհը փակվել է սեփական հայրենիքում Լեռնային Ղարաբաղի հայերի կյանքը դժոխքի վերածելու՝ էթնիկ զտումների համար։ Եթե Ադրբեջանը պնդում է, որ Լաչինի միջանցքը բաց է ու ընդամենը էկոակտիվիստների ակցիա է իրականացվում, ուրեմն թող համաձայնություն տա հայկական կողմի առաջարկին ու Լեռնային Ղարաբաղ ժամանի միջազգային փաստահավաք խումբ, տեղում ծանոթանա իրավիճակին ու խնդրի լուծման տարբերակներ առաջարկի։
Այլապես այլ ելք չի մնում, քան պնդել, որ Ադրբեջանի նպատակը հայությանը սեփական հայրենիքում ցեղասպանելն ու հումանիտար ճգնաժամի զոհ դարձնելն է։ Ռուս խաղաղապահների ու ռուսական կողմի գործադրած ջանքերի մասին խոսելը կամ հույս փայփայելը, թե ռուսական կողմը կկանխի արդեն 45 օր փակ Լաչինի միջանցքի արդյունքում ստեղծված հումանիտար աղետը, կլինի պարզապես միամտություն։ Հարցը լուծող լինեին՝ վաղուց էին լուծել, եթե իհարկե Լաչինի միջանցքը փակելու շահագրգիռ կողմ չեն, ինչը հնարավորություն կտա Ռուսաստանին Հայաստանից կորզել զիջումներ։ Եվ միայն միջազգային փորձագետների տեղակայումը Լաչինում կարող է լուծում տալ Լեռնային Ղարաբաղում ստեղծված հումանիտար ճգնաժամին, հակառակ դեպքում այն կարող է դեռևս երկար շարունակվել։