«Վերադարձ Երևան՝ մեկօրյա հանդիպումների։ Լաչինի միջանցքի շուրջ իրավիճակը լուրջ է և պետք է շտապ լուծումներ գտնել։ Ես անհամբեր սպասում եմ քննարկումներին՝ հետագա ուղիները բացահայտելու համար: ԵՄ նպատակը մնում է Հայաստան Ադրբեջան համապարփակ կարգավորումը», Երևան ժամանելուց առաջ գրել է Եվրամիության հատուկ ներկայացուցիչ Տոյվո Կլաարը: Ինչ օրակարգով կամ առաջարկներով է Երևան գալիս Կլաարը, հայտնի չէ, գուցե դրանք որոշակի ուրվագծվեն երևանյան հանդիպումների մասին հաղորդագրություններում կամ դրանց տողատակերում:
Ընդհանուր առմամբ, Կլաարը կարո՞ղ է Երևան այցի միջոցով փորձ անել այսպես ասած վերականգնել բրյուսելյան ձևաչափը, որի լուծարման մասին իհարկե ոչ ոք չի հայտարարել ոչինչ, բայց որը փաստացի արգելակվեց այն բանից հետո, երբ Երևանը անհրաժեշտ համարեց դեկտեմբերի 7-ին Բրյուսելում հանդիպումը անցկացնել քառակողմ՝ նաև Ֆրանսիայի նախագահի մասնակցությամբ, իսկ Բաքուն հրաժարվեց դրանից, հայտարարելով, որ Ֆրանսիան անաչառ չէ: Իսկ 2022 թվականի դեկտեմբերի 7-ի հանդիպման պայմանավորվածությունը կայացվել էր նույն թվականի հոկտեմբերի 6-ին Պրահայում, հենց Ֆրանսիայի մասնակցությամբ քառակողմ ձևաչափով ու Երևանի դիտարկումը միանգամայն տրամաբանական ու հիմնավոր էր՝ եթե պայմանավորվածությունը եղել է քառակողմ, ուրեմն հանդիպումն էլ պետք է լինի ըստ պայմանավորվածի: Ադրբեջանը հրաժարվեց, հանդիպումը չեղավ, փոխարենը սրվեց իրավիճակը Լաչինի միջանցքի շուրջ:
Դա հի՞մք է եզրակացնելու, որ Բաքուն Լաչինի ուղղությամբ սադրանքի համար էլ չեղարկեց Բրյուսելի գործընթացը, թե՞ հակառակը՝ Բրյուսելը մեծ հաշվով արգելակեց Ֆրանսիան, իսկ Բաքուն ի պատասխան դրա գնաց Լաչինի սադրանքի: Այս հանգամանքներից է կախված, թե ինչ օրակարգով է Երևան գալիս Տոյվո Կլաարը՝ Հայաստանին հորդորելու, որ համաձայնի առանց Ֆրանսիայի եռակողմ բրյուսելյան հանդիպա՞ն, թե՞ Շարլ Միշելի հատուկ ներկայացուցիչն ունի այլ առաջարկներ: Կլաարը վերջին անգամ Հայաստանում եղավ դեկտեմբերի սկզբին, հենց բրյուսելյան հանդիպման չեղարկումից հետո: Հայաստանից նա մեկնեց Անկարա, որտեղ հանդիպումներից հետո հայտարարել էր, որ Անկարան ունի հետաքրքիր առաջարկներ: Այդ ամենին հաջորդում է Լաչինի միջանցքի ավելի քան 40-օրյա արգելափակումը : Ի՞նչ է ուզում Կլաարը Երևանից: Ընդ որում, ուշագրավ է, որ նա Երևան է ժամանում գործնականում զուգահեռ այն որոշման, որ Եվրամիությունը պետք է կայացնի Հայաստանում քաղաքացիական դիտորդական երկարաժամկետ՝ երկամյա առաքելության տեղակայման առնչությամբ, Հայաստանի ու Ադրբեջանի սահմանի մշտադիտարկման համար: Կլաարը այդ որոշման հարցում պայմա՞ն է բերել Հայաստան:
