34 ամյա Ասատուր Մկրտչյանի կյանքը բաժանվել է երկու մասի՝ նախքան 2002 թվականի հոկտեմբերի 21-ը և դրանից հետո։ Ասատուրի ինքնազգացողությունը դպրոցում վատացել է, ուսուցչին խնդրել է դուրս գալ, այնուհետև լսվել է ուժեղ ձայն, ուսուցչի ճիչ, Ասատուրին հայտնաբերել են գետնին արնաշաղախ պառկած։ Անմիջապես տարել են հիվանդանոց, որից հետո սկսվել է կյանքի համար պայքարի երկար շրջան։
Ասատուրի ծնողներին բժշիկները ասել են, որ ապրելու շանսերը շատ քիչ են, նույնիսկ որոշել են սարքերն անջատել, սակայն վերջինիս մայրը չի հանձնվել, ինչի շնորհիվ Ասատուրն այսօր ողջ է։ «Կյանքը՝ երկրորդ փորձից» հաղորդման շրջանակներում Ասատուրը պատմեց, որ շատերն իր առողջական խնդիրների պատճառով իրենից սկզբում երես են թեքել, սակայն նա իր պայքարի համառությամբ ապացուցել է, որ չնայած խոսելու որոշակի դժվարություններին, այսօր կարող է ապրել որպես լիարժեք մարդ։