ԲԴԽ-ի կայացրած որոշումը, որով Շիրակի մարզի ընդհանուր իրավասության դատարանի քրեական մասնագիտացմամբ 4 դատավորներ կտեղափոխեն Երևան, լուրջ վրդովմունք է առաջացրել մարզում։
Փաստաբան Արամայիս Հայրապետյանը «Առաջին լրատվական»-ի հետ զրույցում նշեց, որ սա առաջին դեպքը չէ, երբ Շիրակի մարզում դատավորները կարճ ժամանակ աշխատում են, ապա տեղափոխվում են Երևան, արդյունքում նրանց գործերը, որոնք չեն ավարտվել, փոխանցում են նոր դատավորին, և ծախսված ժամանակը փոշիանում է։ «Ոչ միայն ողջամիտ ժամկերտներում չեն ավատվում, անձինք անորոշության մեջ են, մարդիկ կան, քրեական գործերն կան, որ շուրջ 8-9 տարի դատարաններում է: Ես ունեմ քրեական գործ, այս տարի կլրանա ութ տարին, 2018-ից ունեմ սկսած գործ, որը մուտք է եղել դատարան, հիմա նորից պետք է սկսենք։ Մի դատավորը գնում է, չենք հասցնում ավարտել, շրջապտույտի մեջ ենք։ Մարդիկ ասում են դատապարտեք, ավարտեք գործերը»,-ասաց նա՝ հավելելով, որ կարելի է վստահ պնդել, որ դատարանը չի աշխատում, արդարադատություն չի իրականացում՝ չհաշված ռեսուրսների վատնումը։
«ԲԴԽ-ի այս քայլն անտրամաբանական է: Եթե խնդիրն այն է, որ դատավորը Երևանում է բնակվում, բայց այդ ամենի մասին ԲԴԽ պետք է նախապես մտածի, կամ գոնե 4 տարի աշխատող դատավորին տանի, գնացածներից ամենահին դատավորը 1 տարվա դատավոր է Շիրակի մարզում։ Փաստաբանների մոտ էլ կուտակվում են հսկայական գործեր»,-ընդգծեց նա:
Շիրակի փաստաբաններից Հայկ Հարությունյանն էլ «Առաջին լրատվական»-ի հետ զրույցում նշեց, որ մշտապես էլ դեպքեր եղել են, որ դատավորը, ասենք, բարձրացում է ունեցել, վերաքննիչ է գնացել, կամ Երևան է տեղափոխվել, բայց դա զանգվածային բնույթ չի կրել. «Քիչ են եղել դեպքերը, որ դատավորը 6 ամիս աշխատի ու տեղափոխեն: գոնե մի քանի տարի աշխատել է, նոր տեղափոխել են: Այստեղ խնդիրն այն է, որ և արագ են փոխում, և շատ կարճ ժամանակով են դատավորներին նշանակում Շիրակի մարզում: Սա վերաբերում է և քերական, և քաղաքացիական գործերին: Ավելի շատ հեղափոխությունից հետո է այսպես, նախկինում, կարծես նման խնդիրներ չունեինք: Բացի այդ, հեղափոխությունից հետո գործերը շատացան և այդ պատճառով ևս գործերը ավելի շատ են կուտակվել: Դրա համար այսօր դատարաններն այնպես են ծանրաբեռնված, որ նույնիսկ հասարակ գործերը տարիներ են տևում: Եթե առաջ գոնե 1-2 տարի աշխատում, նոր էին տեղափոխվում, ապա այս վերջին 2 ամսվա ընթացքում 7-8 դատավոր տեղափոխեցին: Հիմա ունենք իրավիճակ, երբ քաղաքացիական գործերով 2 դատավոր տեղափոխեցին, որոնք 6 ամիս էին մեզ մոտ աշխատել: Հիմա ևս երկու քաղաքացիական դատավորներ տեղափոխում են հունվարին: Հետո էլ 4 քրեական դատավորների ԲԴԽ-ն որոշեց տեղափոխել»,-ասաց փաստաբանը:
Նա նկատեց, որ շատ գործերով վաղեմության ժամկետներն անցնում են և մարդիկ ազատվում են քրեական պատասխանատվությունից: «Մեր մարզը փորձադաշտ են դարձրել, մարդիկ չգիտես ինչու, չեն ուզում աշխատել մեր մարզում: Հասկանում ենք, որ Երևանից են, իրենց ընտանիքները Երևանում են, դատավորին հարմար չէ Շիրակի մարզում աշխատելը, բայց ունենք նաև գյումրեցի դատավորներ, որոնց էլ լրիվ ուրիշ մարզում են նշանակել, օրինակ, Սյունիք: Մենք հիմա քննարկում ենք, թե ինչ մեխանիզմներով կարող են բարձրաձայնել, որ այս խնդրին ինչ-որ լուծում տրվի: Քրեական գործերով ամբաստանյալներ կան, որ 4-5 դատավոր են փոխել, և ամեն անգամ գործը սկսվում է զրոյից: Ի վերջո, եթե նույն վկային 5 տարի առաջ կանչեինք, կարող է շատ բաներ հիշեր, իսկ հիմա որևէ բան չհիշի և գործերի քննությունն էլ կարծես անիմաստ է դառնում: Անգամ մարդիկ ասում են՝ պատրաստ ենք դատվենք, մենակ թե դատավոր լինի, նույն բանի միջով 4-5 անգամ չանցնենք: Կամ ասենք հասարակ ամուսնալուծության կամ երեխայի ալիմենտի գործեր են, մարդիկ դիմել են ակնկալիքով, բայց կարող է դա տարիներ տևել: Ողջամիտ ժամկետ ասվածը որևէ կերպ չի իրականանում: Քաղաքացիները դրա պատճառով փաստաբանների հետ են վիճում, ասելով՝ էդ ի՞նչ գործ էր, որ տարիներ պետք է տևեր: Մենք անզոր ենք, չենք կարող ազդել ԲԴԽ-ի վրա, որ դատավոր մի փոխեք, կամ գոնե թողեք որոշակի գործեր ավարտեն, նոր գնան: Եթե նույն գործը 5-րդ դատավորին են տալիս, ստացվում է, որ էն առաջին 4 դատավորներն ինչ արել են, անիմաստ է եղել: Բայց դրա համար ռեսուրս են ծախսել, աշխատավարձ են ստացել, նամակագրություն են արել, կալանավոր են տարել-բերել: Մենք, փաստորեն, պետության գումարներն անիմաստ ծախսել ենք»,-ասաց փաստաբանը:
