Ռուսաստանի արտաքին գործերի նախարար Սերգեյ Լավրովը գովաբանում է Վրաստանին և նրա կառավարությանը՝ Արևմուտքին ընդդիմանալու համար:«Վրաստանի կարողությունը՝ դիմակայել Արևմուտքի ճնշմանը, որը բացահայտորեն պահանջում է միանալ հակառուսական պատժամիջոցներին, հարգանք է առաջացնում:Մենք տեսնում ենք, որ Վրաստանը, ինչպես գրեթե բոլոր երկրները, գտնվում է Արևմուտքի ճնշման տակ։ Արևմուտքը պահանջում է միանալ Ռուսաստանի դեմ պատժամիջոցներին, և այն, որ փոքր երկիրն ու նրա կառավարությունները խիզախություն ունեն ասելու, որ առաջնորդվելու են սեփական շահերով ու սեփական տնտեսության շահերով, հիացմունքի է արժանի»,- ասել է Լավրովը:
Լավրովը հույս է հայտնել, որ շուտով կվերականգնվեն Վրաստանի հետ ուղիղ չվերթները, որոնք Մոսկվան է դադարեցրել.«Ուրախ եմ, որ մեր երկրում ակտիվորեն զարգանում են մարդկանց միջև շփումները։ Անցյալ տարի ինձ ասացին, որ Վրաստանի ՀՆԱ-ն աճել է 10 տոկոսով, մեծ մասամբ Ռուսաստանի Դաշնության հետ զբոսաշրջության և առևտրային հարաբերությունների շնորհիվ։ Հուսով եմ, որ շուտով մեզ կհաջողվի վերսկսել ուղիղ չվերթները»:
Նշենք, որ Ուկրաինայում Ռուսաստանի կողմից սանձազերծած պատերազմից հետո, որը շարունակվում է առ այսօր, ուկրաինական կողմը բազմիցս վրաստանյան իշխանություններին մեղադրել է Ռուսաստանին պատժամիջոցները շրջանցելու հարցում օգնություն ցուցաբերելու մեջ.«Վրաստանի իշխող «Վրացական երազանք» կուսակցության ներկայացուցիչները պարեբրաբար կրկնում էին, որ Վրաստանը Ռուսաստանի դեմ պատժամիջոցներ չի կիրառի՝ տնտեսական պատճառներից ելնելով:
Վրաց քաղաքագետ Գելա Վասաձեն «Առաջին լրատվական»-ի հետ զրույցում առաջարկում է հարցին մոտենալ այն տեսակետից, թե դա ինչու է պետք Վրաստանին և ինչու է պետք Ռուսաստանին.«Նախևառաջ՝ ինչու՞ է պետք Ռուսաստանին։ Լինելով ազատ աշխարհի մեծ մասից մեկուսացված, Ռուսաստանի համար այսօր շատ կարևոր է ցանկացած կոնտակտ, ցանկացած դրական ազդակ, հատկապես այնպիսի երկրից, ինչպիսին Վրաստանն է, որի տարածքի 20 տոկոսն ինքն օկուպացրել է։ Այլ հարց է, որ Լավրովը ստեց՝ ասելով, որ Վրաստանը չի միացել հակառուսական պատժամիջոցներին։ Իհարկե Վրաստանը միացել է հակառուսական պատժամիջոցներին, որովհետև չէր կարող չմիանալ»։
Մեր զրուցակիցը նաև հավելեց, որ ինքը բավականին երկար ժամանակ խոսել է այն մասին, որ Վրաստանի կառավարությունը ոչ թե պրոկրեմլյան է, այլ «պրոփողային».«Այսօր իրավիճակը դասավորվել է այն կերպ, որ երբ խոսում ենք փողամետ լինելու մասին, դա արդեն իսկ նշանակում է լինել պրոկրեմլյան ու պրոփողային։ Ռուսաստանը շատ լավ տեսնում է, թե Ուկրաինան ինչքան ցավոտ է այս հարցն ընկալում և համապատասխանաբար խփում այդ ցավոտ կետին»
Ինչու է դա պետք Վրաստանին, ըստ Վասաձեի, Վրաստանին դա ոչ մի կերպ պետք չէ.«Իսկ ահա իշխանություններին, այն մարդկանց, ովքեր որոշումներ են կայացնում՝ դա պետք է, որպեսզի փող աշխատեն։ Ես հասկանում եմ, որ իրենք թքած ունեն Վրաստանի ճակատագրի վրա, բայց կարծես նաև թքած ունեն իրենց անձնապես սպառնացող վտանգների վրա ևս։ Իսկ անձնական ռիսկերն այն են, որ կարող է գալ մի ժամանակահատված, երբ արևմուտքն իր տեխնոլոգիաներով բանկային սեկտորից կկտրի ոչ թե կոնկրետ երկրների, այլ անձերի։ Իսկ իրենք այդ անձերի ցանկում են։ Սա Վրաստանի իշխանությունների ընտրութունն է»։
Մեր զրուցակիցն արձանագրեց՝ Հարավային Կովկասի համար սա տխուր նորություն է.« Եթե Վրաստանը դառնում է պրոռուսական, Հայաստանի ու Ադրբեջանի հեռանկարներն այս առումով բավականին տխուր տեսք կունենան, բարդ է լինելու։ Բայց ոչինչ անել չես կարող, իրավիճակը սա է»,-եզրափակեց նա։
