Հունվարի 19-ի լուսաբացը ողբերգական էր: Գիշերը հրդեհ է բռնկվել Գեղարքունիքի մարզի Ազատ գյուղում տեղակայված ինժեներասակրավորային զորամասի զորանոցում, որի հետևանքով զոհվել է 15 զինծառայող, իսկ երեքի վիճակը ծանր է: Պաշտպանության նախարար Սուրեն Պապիկյանը կառավարության նիստում հայտնել է, որ հրդեհի պատճառը եղել է հակահրդեհային կանոնների խախտումը, կիրառվել է ավտոբենզին՝ հավանաբար վառարանը վառելու համար, ինչի հետևանքով բռնկված հրդեհը մարելը եղել է շատ դժվար: Հետևանքը ողբերգական է: Թեմայի շուրջ «Առաջին լրատվական»-ը զրուցել է Հելսինկյան քաղաքացիական ասամբելայի Վանաձորի գրասենյակի ղեկավար, իրավապաշտպան Արթուր Սաքունցի հետ:
Իրավապաշտպանի խոսքով` սա հանցավոր անգործության հետևանք է. «Այս ողբերգական դեպքի հետ կապված տարատեսակ տվյալներ են, կոնկրետ քննություն պետք է իրականացվի: Չպետք է այս դեպքը դիտարկել որպես եզակի դեպք. իսկ ինչ երաշխիք կա, որ նման «հրդեհներ» չեն լինի: Վերաբերմունքը զինծառայության նկատմամբ չի փոխվել. հրամանատարների կողմից անուշադրություն է»:
