Այսօր Բլինքենն ասաց, որ Փաշինանն անկեղծ է, բայց մենք անկեղծությունն ուզում ենք տեսնել ոչ միայն խոսքով, այլևս գործով, Վաշինգտոնում թուրքական համայնքի հետ հանդիպմանն ասել է Մեվլութ Չավուշօղլուն, որն ԱՄՆ էր ժամանել Էնթոնի Բլինքենի հետ հանդիպման, ամերիկա-թուրքական ռազմավարական երկխոսության ձևաչափի հանդիպման ու աշխատանքի համար: Չավուշօղլուի այդ այցին զուգահեռ, ԱՄՆ պետքարտուղարը հեռախոսազրույց է ունեցել Հայաստանի վարչապետ Նիկոլ Փաշինյանի հետ: Ըստ պետքարտուղարության խոսնակ Նեդ Փրայսի, պետքարտուղարը ողջունել է վարչապետի հավատարմությունը խաղաղությանը:
Կողմերը քննարկել են Ադրբեջանի հետ երկկողմ բանակցությունները վերսկսելու քայլերը։ Պետքարտուղարը խոր մտահոգություն է հայտնել Լեռնային Ղարաբաղում հումանիտար իրավիճակի վատթարացման կապակցությամբ, որը պայմանավորված է Լաչինի միջանցքի շրջափակմամբ»: Ինչ են քննարկել Փաշինյանն ու Բլինքենը, և ինչի՞ առնչությամբ է Բլինքենը Չավուշօղլուին ասել, որ Փաշինյանն անկեղծ է: Այս մանրամասները մնում են հանդիպումների կամ հեռախոսազրույցների «վարագույրի» հետևում: Մինչդեռ, դրանք են կարևոր իրավիճակը գննահատելու հնարավորության տեսանկյունից, քանի որ այդ մանրամասներն են թույլ տալիս հասկանալ տարբեր խաղացողների առավել կոնկրետ ակնկալիքները Հայաստանից, ինչպես նաև առաջարկները՝ Հայաստանին: Նեդ Փրայսը նշել է, թե Բլինքենը ակնկալում է առաջիկայում հեռախոսազրույց ունենալ նաև Ալիևի հետ:
Երևանը հայտարարում է, որ Լաչինի միջանցքի վերաբերյալ չի բանակցի Ադրբեջանի հետ, քանի որ այդ հարցում չկա բանակցելու բան՝ կա Ադրբեջանի պարտավորությունը, որ բխում է նոյեմբերի 9-ի հայտարարության 6-րդ կետից: Միաժամանակ, ԱՄՆ-ը կարծես թե այն դիրքում է, որ պետք է բանակցություն: Այդ մասին պետքարտուղարությունը հայտարարեց այն բանից հետո, երբ Բլինքենի տեղակալ Դոնֆրիդը մոտ տասն օր առաջ հեռախոսազրույցներ ունեցավ Արարատ Միրզոյանի և Ջեյհուն Բայրամովի հետ: Դրանից հետո տարածված հաղորդագրության մեջ պետքարտուղարությունը նշում է, որ ոչ Հայաստանին ու Ադրբեջանին հորդորում են անհապաղ բանակցել Լաչինի միջանցքը բացելու համար: Հնարավոր է ենթադրել, որ Բլինքենի զանգը Փաշինյանին ունի նպատակ փոխել Երևանի դիրքորոշումը, որ արտահայտվել է Դոնֆրիդ-Միրզոյան զրույցում և որով Երևանը նշում է միջանցքը բացելու հարցում Ադրբեջանի պարտավորությունը, ասելով, որ այդ թեմայով չկա բանակցելու բան: Բլինքեննին հաջողվե՞լ է որևէ կերպ համոզել արդեն Նիկոլ Փաշինյանին՝ դիրքորոշում վերանայելու առոււմով, թե՞ Երևանը դրել է որոշակի պայման, որը Բլինքենն ակնկալում է քննարկել Ալիևի հետ, իսկ Չավուշօղլուից էլ ակնկալում է օգնություն այդ հարցում: Բայց, ստացվում է, որ Թուրքիան էլ դնում է իր պայմանը, հայտարարելով, թե Հայաստանից ակնկալում է ոչ թե խոսք, այլ գործ: Բայց ի՞նչ գործ, եթե հաշվի առնենք և այն, որ մինչ Չավուշօղլուի Վաշինգտոն մեկնելը, դրա նախօրյակին Անկարա էր ժամանել և Չավուշօղլուի հետ բանակցել Իրանի արտգործնախարարը, իսկ դրա նախօրյակին էլ տեղի էր ունեցել Էրդողան-Պուտին հեռախոսազրույց: