ԱԺ «Ժառանգություն» խմբակցության պատգամավոր Արմեն Մարտիրոսյանը մամուլի ասուլիսի ժամանակ տեղեկացրեց, որ «Ավտոմեքենաների օգտագործումից բխող պատասխանատվության պարտադիր ապահովագրության մասին» օրենքը թեև մասշտաբային ձևով քարոզվեց, այնուամենայնիվ, ՀՀ քաղաքացիները հնարավորություն չունեն մեքենաները ապահովագրելու: Արմեն Մարտիրոսյանը կարծում է, որ կառավարությունը այսպիսի ֆինանսական ճգնաժամի պայմաններում քաղաքացիներին չպետք է դնի հավելյալ բեռի տակ: Ըստ ԱԺ պատգամավորի` ավտոմեքենան կառավարությունը չպետք է դիտարկի որպես հարստացման միջոց, այլ իրական եկամուտները քաղի տնտեսությունից: Իսկ այդ օրենքով, ըստ Ա. Մարտիրոսյանի, իշխանությունն առաջարկում է հեղափոխական լուծումներ` չմտածելով քաղաքացիների սոցիալական կարիքների մասին: Քանի որ այդ օրենքը պետք է ուժի մեջ մտնի գալիք տարվա հունվարի 1-ից, ապահովագրությունը պետք է իրականացվի մինչև հունվարի 1-ը: Արմեն Մարտիրոսյանը նկատեց, որ օրենքի վերաբերյալ քարոզչությունը պարտադրանքի տարրեր է պարունակում, և դա հատկապես արվում է Կենտրոնական բանկի նախագահի տեղակալի կողմից:
