Հայաստանում շարունակվում է ձկների անկումը։ Նախնական տվյալներով՝ մոտ 100 տոննա ձուկ է սատկել, իսկ միայն մեկ տնտեսությունում 58 տոննա ձուկ է սատկել։
Սննդամթերքի անվտանգության տեսչական մարմնի ղեկավար Գեորգի Ավետիսյանը «Առաջին լրատվական»-ի հետ զրույցում նշեց, որ այս պահին անասնահամաճարակային մշտադիտարկում ենք իրականացնում․
«Ինքս 20 տնտեսություններում եղել են, և հիմա այն, ինչ ներկայացնում են, իրականությանը չի համապատասխանում։ Կան, իհարկե, անկումներ, բայց ոչ այն մասշտաբի, որ ներկայացնում են։ Մենք մշտադիտարկում ենք իրականացնում, լաբորատոր հետազոտություն ենք անում, այս պահի դրությամբ մոտավոր պատկերացում ունենք՝ ինչ հիվանդությունների արդյունքում են սատկում ձկները։ Մի քանի հետազոտություն էլ կանենք, և ավելի հստակ պարզ կլինի՝ ձկների անկման պատճառը»,-ասաց Գեորգի Ավետիսյանը։ Ձկների անկման մի քանի պատճառներ կան, և արդեն մի քանի տնտեսություններում նկատել են այդ պատճառները՝ Aeromonas hidrophila բակտերիալ և սապրոլեգնիոզ սնկային հիվանդությունները: Ավետիսյանը նշեց, որ այս պահին տարբեր կասկածներ ունենք, բայց վերջնական մի բան կարող ենք ասել, որ մարդկանց առողջության համար այդ հիվանդությունները վտանգավոր չեն։ Այսինքն՝ եթե այդ հիվանդություններով վարակված ձուկ գնի քաղաքացին, դա կյանքին և առողջությանը վտանգ չի սպառնում։
«Մենք բազմիցս քաղաքացիներին ասել ենք և շարունակում ենք ասել, որ փողոցից բան մի գնեք։ Իսկ ակվարիուներում, ջրավազաններում վաճառվող ձուկը մենք տեսնում ենք, որ ողջ է։ Փողոցից ամեն դեպքում չի կարելի որևէ կենդանական ծագման մթերք գնել»,-հավելեց տեսչական մարմնի ղեկավարը։
Գեորգի Ավետիսյանի դիտարկմամբ՝ սրանք այն հիվանդություններն են, որոնց հետ մենք ապրում ենք, և սթրես-ֆակտորները հաշվի առնելով՝ դրանք գլուխ են բարձրացնում, իսկ սթրես ֆակտորից կարող է լինել ջրավազաններում ձկների խտությունը, ջերմաստիճանի տատանումը, այսինքն՝ կան շատ տարբեր սթրես ֆակտորներ, որոնք ձկների իմունիտետը գցում են, իսկ իմունտետի անկման հետևանքով յուրաքանչյուր հիվանդություն կարող է գլուխ բարձրացնել։
«Մենք աշխատում ենք հասկանալու, թե ինչ պատկեր ունենք, մեկուսացնելու, եթե հիվանդության տարածման վտանգ կա, իսկ բուժման և կանխարգելման մեթոդներ կան, որոնք մասնագետները խորհուրդ են տալիս տնտեսվարողներին»,-ասաց Գեորգի Ավետիսյանը։
Այս պահին մոնիտորինգ է իրականացվում Մասիսի տարածաշրջանի 51 տնտեսվարողի մոտ։ Ձկների անկումները նկատվել են միայն այդ հատվածում, Արարատից հետո մշտադիտարկում են անելու նաև այլ մարզերում։