Եթե անհրաժեշտ լինի, մենք բոլորս մեր կյանքը կտանք, կպաշտպանենք մեր հայրենիքը, Սյունիքի ողջն բնակչությունը պատրաստ է ամեն մի քառակուսի մետրի համար իր կյանքը տալ, եթե ՊՆ-ն նման հրաման տա։ Այս մասին «ԻնՍպորտ Սյունիք»-ի բացման արարողությունից հետո լրագրողների հետ զրույցում ասաց Սյունիքի մարզպետ Ռոբերտ Ղուկասյանը։
«Թե՛ ես, թե՛ բոլոր համայնքների ղեկավարները և բնակիչները պատրաստ ենք ցանկացած սցենարի, բնականաբար խնդիրների լուծման ամենացանկալի ճանապարհը դիվանագիտականն է, բայց եթե անհրաժեշտ լինի, ապա ևս մեկ անգամ Սյունիքը կապացուցի, որ պատրաստ է ձեռքը տանել զենքը և պաշտպանել իր հայրենիքը»,- նշեց նա։
Ղուկասյանի խոսքով՝ ո՛չ Սև լճում, ո՛չ էլ մյուս բնակավայրերում ոչ մի հայ չի կարող հարմարվել ադրբեջանական ներթափանցման հետ, բայց քաղաքացիական անձինք չեն կարող թելադրել, թե դիրքերում կանգնած զինվորներն ինչ անեն, եթե իրենց կարիքը զգացվի, ՊՆ-ն անպայման կտեղեկացնի։
«Ցանկացած հայ պետք է միշտ մտածի այնպես, որ ինքը պետք է հետ գնա այնտեղ, որտեղից եկել է։ Այդպես եմ մտածում ես, այդպես է մտածում Սյունիքի մարզի ցանկացած քաղաքացի։ Ուղղակի մենք պետք է տեսնենք, թե ինչ է ասում մեր պաշտպանության նախարարը, թե ինչ են ասում մեր զինվորները, մեր գեներալները, մեր սպաները։ Մենք չենք կարող, լինելով քաղաքացիական անձինք, թելադրել, թե ինչ անի զինվորը, երբ ինքը 24 ժամ կանգնած է այնտեղ։ Ես վստահ եմ, որ եթե անհրաժեշտ լինի՝ Գորիսից, Տեղից, Տաթևից, Սիսիանից բոլոր տղամարդիկ պատրաստ են պայքարել»,- ասաց Ղուկասյանը։
