Վրաստանում բենզինը կշարունակի էժանանալ։ Ազգային մրցակցության գործակալության ղեկավար Իրակլի Լեքվինաձեի խոսքով՝ մարտից բոլոր տեսակի վառելիքի արժեքը նվազել է ավելի քան մեկ լարիով։ Իրակլի Լեքվինաձեի խոսքով, ապագայում դեռ սպասվում է գնի նվազում։ Բացի այդ, ըստ Լեքվինաձեի, կան վառելիքի գների հետագա իջեցման նախադրյալներ։
«Մենք մշակում ենք առաջարկություններ, թե ինչ պետք է արվի, որպեսզի նշված հարցերի պատասխանները հնարավորինս տրվեն, շուկան լինի ավելի մրցունակ ու թափանցիկ։ Մարտից մինչ այժմ վառելիքի գինը նվազել է ավելի քան մեկ լարիով։ Դրա համար որոշիչ գործոնը միջազգային գներն են, որոնք այսօր զգալիորեն ցածր են, և վերջին շրջանում ազգային փոխարժեքի ուժեղ միտումը։ Այս ամենն անշուշտ ազդեց շուկայի վրա։ Այնուամենայնիվ, մենք դեռ կարծում ենք, որ է՛լ ավելի հնարավոր է գնային շտկում ակնկալել էժանացման ուղղությամբ։ Այսօրվա նախապայմանները մեզ հիմք են տալիս ասելու դա»,- ասել է Լեքվինաձեն։
Հայաստանում նույնպես վառելիքի գները իջնում են։ Տնտեսագետ Կարեն Սարգսյանը «Առաջին լրատվական»-ի հետ զրույցում նշեց, որ այս իջեցումը հիմնականում պայմանավորված է միջազգային գներով։ Նա նշեց, որ դիզվառելի գծով անկում գրեթե չի եղել, միայն բեզնինի շուկայում է անկումը։
«Այս ամենը հիմնականում պայմանավորված է Ռուսաստանի հանդեպ վառելիքի իրացման սահմանափակումներով, ինչի արդյունքում այլ տեղերում ավելցուկային ծավալ է առաջացել, ինչն էլ հանգեցնում է գնանկման:
Մեր վառելիքը հիմնականում գալիս է Ռուսաստանից, հետևաբար, այդ փոփոխությունը նաև մեզ վրա է ազդել: Ռուսաստանի նկատմամբ պատժամիջոցները կարող են և բարձրացնել գները, և նվազեցնել. եթե հիշում եք, պատժամիջոցների սկզբում մեզ մոտ գները կտրուկ բարձրացան, բայց հետագայում քանի որ միջազգային շուկայում վերադասավորումներ եղան, և այլ մատակարարներ ևս մեծ ծավալներով ապրանք են մտցրել շուկա և եվրոպական երկրներն իրենց հարցերը կարծես լուծել են, և այս դեպքում արդեն հակառակ արդյունքն ենք տեսնում, գների անկում է նկատվում: Այսինքն պատժամիջոցները կարող են բերել և գնաճի, և գների իջեցման՝ կախված նրանից, թե այդ պահին շուկայում ինչ կոնյուկտուրա է ձևավորված»,-ասաց նա:
Հարցին, թե որքանո՞վ են դոլարի և եվրոյի փոխարժեքներն ազդում վառելիքի գների վրա, Կարեն Սարգսյանը պատասխանեց. «Մասնակի ազդում են, բայց ոչ մեծ չափով: Եթե մեծ ազդեցություն ունենային, ապա երբ այս տարվա առաջին ամիսներին դոլարի ու եվրոյի փոխարժեքները կտրուկ նվազեցին, վառելիքի գները չնվազեցին, անգամ բարձրացան: Երկրորդը, եթե մենք ՌԴ-ի հետ առևտուր ենք անում, դա անում ենք ռուսական ռուբլով, այդ թվում ԵԱՏՄ շրջանակներում: Իսկ ռուբլու փոխարժեքը այդքան մեծ տատանում չի տվել, որ էականորեն ազդի վառելիքի գների վրա:
Այստեղ կա նաև ժամանակի գործոնը: Եթե հին խմբաքանակը թանկ է գնվել, բնականաբար, թանկ էլ պետք է վաճառվեր, նոր խմբաքանակն արդեն էժան է ներմուծվել, բնականաբար, էժան գնով կվաճառվի»:
Ինչ վերաբերում է նրան, որ Վրաստանում բենզինն ավելի էժան է, քան Հայաստանում, տնտեսագետն ասաց. «Վրաստանը վառելիքի տեղափոխման վրա շատ ավելի քիչ գումար է ծախսում, քան Հայաստանը: Վրաստանի նաև Ադրբեջանից է վառելիք ներկրում շատ կարճ ճանապարհով և ավելի էժան գնով: Հայաստանը Ռուսաստանից է ներկրում, և բնականաբար, գներն ավելի բարձր կլինեն: Մեզ մոտ անուղղակի ծախսերն ավելի շատ են: Դրա համար մեզ մոտ միշտ էլ թանկ է եղել: Եթե ասենք, սահմանները բացվեն և ադրբեջանական վառելիք ներկրենք, մեզ մոտ ևս գները կլինեն այնպիսին, ինչպիսին Վրաստանում է, եթե ոչ ավելի էժան»:
