Հունվարի 16-ին Դատավորների ընդհանուր ժողով է հրավիրվել, օրակարգում՝ Բարձրագույն դատական խորհրդի դատավոր անդամի թափուր տեղի ընտրության հարցն է։ Միակ թեկնածուն՝ Վճռաբեկ դատարանի Վարչական պալատի դատավոր Քրիստինե Մկոյանն է։
Հիշեցնենք, որ ԲԴԽ անդամ Ստեփան Միքայելյանը հրաժարականի դիմում էր ներկայացրել, որի հիման վրա Խորհուրդը որոշել էր դադարեցնել Միքայելյանի՝ որպես ԲԴԽ անդամի լիազորությունները։
ԲԴԽ-ից հայտնում են, որ 2023թ հունվարի 16-ին Դատավորների ընդհանուր ժողով է հրավիրվել՝ ԲԴԽ դատավոր անդամի թափուր տեղի ընտրության օրակարգով։
«2023 թվականի հունվարի 16-ին հրավիրված Դատավորների ընդհանուր ժողովին Բարձրագույն դատական խորհրդի դատավոր անդամի թափուր տեղի ընտրությունը կազմակերպելու նպատակով Դատական դեպարտամենտի ղեկավարի պարտականությունները կատարողը, ղեկավարվելով «Հայաստանի Հանրապետության դատական օրենսգիրք» սահմանադրական օրենքի 76-րդ հոդվածի 5-րդ մասով, 2022 թվականի դեկտեմբերի 19-ին և 20-ին ծանուցագրեր է ուղարկել Բարձրագույն դատական խորհրդի դատավոր անդամի թեկնածուի համար Սահմանադրության 174-րդ հոդվածի 2-րդ մասով և «Հայաստանի Հանրապետության դատական օրենսգիրք» սահմանադրական օրենքի 76-րդ հոդվածի 1-4-րդ մասերով և 80-րդ հոդվածի 2-րդ մասով սահմանված պահանջները բավարարող՝ Հայաստանի Հանրապետության վճռաբեկ դատարանի Վարչական պալատի 3 դատավորների:
Հայաստանի Հանրապետության վճռաբեկ դատարանի Վարչական պալատից ստացվել է Բարձրագույն դատական խորհրդի դատավոր անդամի թեկնածուների 2 դիմում՝ իրենց անունները քվեաթերթիկում չներառելու մասին, ինչպես նաև ստացվել է քվեաթերթիկում ներառված դատավորի՝ «Կոռուպցիայի կանխարգելման հանձնաժողովիմասին» օրենքով նախատեսված բարեվարքության վերաբերյալ լրացված հարցաթերթիկը»,- նշել են ԲԴԽ-ից՝ հայտնելով, որ 2023 թվականի հունվարի 16-ին հրավիրված Դատավորների ընդհանուր ժողովին Բարձրագույն դատական խորհրդի դատավոր անդամի թափուր տեղի ընտրության քվեաթերթիկում ներառվել է մեկ թեկնածու։ Միակ թեկնածուն Վճռաբեկ դատարանի Վարչական պալատի դատավոր Քրիստինե Մկոյանն է։