Կոսովո և Մետոքիայի Ինքնավար Երկրամասի տարածքում պետք Է անհապաղ ստեղծվի Սերբական մունիցիպալիտետների համայնք (ՍՄՀ), հայտարարել են Եվրոպայի և Եվրասիայի հարցերով ԱՄՆ-ի պետքարտուղարի օգնականի տեղակալ Գաբրիել Էսկոբարը և պետքարտուղարության խորհրդական Դերեկ Շոլլեն Պրիշտինայում կայացած համատեղ մամուլի ասուլիսում։
Այս մասին տեղեկանում Է ТАСС գործակալությունից: Շոլլեն հավելել է, որ սերբական ինքնավար երկրամասում իրադրությունը լարված է, և անհրաժեշտ է երկխոսություն կազմակերպել Բելգրադի և Պրիշտինայի միջև ԱՄՆ-ի և ԵՄ-ի աջակցությամբ։ Իր հերթին Էսկոբարն ընդգծել է, որ ՍՄՀ-ի ստեղծումը «միջազգային պարտավորություն է, և կողմերից ոչ մեկը չի կարող խուսափել դրանից»։
Բելգրադի և Պրիշտինայի միջև 2013 թ. ապրիլի 19-ի՝ հարաբերությունների կարգավորման շուրջ բրյուսելյան համաձայնագրերին համապատասխան՝ Կոսովոյում պետք է ստեղծվի Սերբական մունիցիպալիտետների համայնք՝ չճանաչված հանրապետությունում բնակվող սերբերի ինքնակառավարման մարմին։ Իրավիճակը Կոսովո և Մետոքիայում կտրուկ սրվել էր 2022 թ. դեկտեմբերի 6-ին, երբ չճանաչված կազմավորման հատուկ նշանակության ուժերը Եվրամիության առաքելության պարեկների ուղեկցությամբ սկսել էին գրավել ընտրական հանձնաժողովների տարածքները երկրամասի հյուսիսում։
Սերբ բնակչությունը հակահարված էր տվել կոսովացիներին, որոնք հեռացել էին Իբար գետից այն կողմ: Դեկտեմբերի 8-ին մոտ 350 ոստիկաններ Կոսովոյից զրահամեքենաներով ներխուժել էին ինքնավար երկրամասի՝ սերբերով բնակեցված հյուսիս և շրջափակել Կոսովսկա Միտրովիցայի հյուսիսային հատվածը։ Այս քաղաքում դեկտեմբերի 10-ին Կոսովոյի ոստիկանությունը ձերբակալել էր սերբ նախկին ոստիկան Դեյան Պանտիչին։
Ի պատասխան՝ սերբ բնակչությունն արգելապատնեշներով փակել Էր մի քանի բնակավայրերի ճանապարհներ։ Դեկտեմբերի 26-ին Կոսովոյի իշխանությունները լիակատար պատրաստության վիճակի էին բերել զինված ուժերը: Ի պատասխան՝ Սերբիայի փոխվարչապետ, պաշտպանության նախարար Միլոշ Վուչևիչը և ներքին գործերի նախարար Բրատիսլավ Գաշիչը հայտարարել էին, որ զինված ուժերը և ներքին գործերի նախարարության ուժերը նույնպես մարտական պատրաստության վիճակի են բերվել նախագահ Ալեքսանդր Վուչիչի հրամանով: Դեկտեմբերի 28-ին իրադրությունը հաջողվել Էր կայունացել:
ԵՄ-ի և ԱՄՆ-ի երաշխիքներից հետո Պրիշտինան սկսել Էր ազատ արձակել կալանավորված սերբերին, իսկ Վուչիչը հայտարարել էր, որ երկու օրվա ընթացքում արգելապատնեշները կքանդվեն: