Գերմանիայի կանցլեր Օլաֆ Շոլցը հազիվ թե փոխի իր թերահավատ դիրքորոշումն Ուկրաինային մարտական տանկեր մատակարարելու հարցում, եթե ԱՄՆ նախագահ Ջո Բայդենը հակառակ կոչը չանի:
Այս մասին գրել է Politico հրատարակությունը՝ վկայակոչելով Գերմանիայի կառավարության երկու աղբյուրների։ «Շոլցի դիրքորոշումը մեծապես կախված է ԱՄՆ նախագահ Ջո Բայդենից, որի հետ կանցլերն արդեն նախկինում սերտորեն համակարգել է իր գործողությունները», – նշում է պարբերականը՝ հիշեցնելով, որ անցյալ շաբաթ երկու ղեկավարներն արդեն համատեղ հայտարարություն են տարածել Կիևին գերմանական և ամերիկյան հետևակի մարտական մեքենաների մատակարարման վերաբերյալ։
Շոլցը նախկինում բազմիցս շեշտել է զենքի մատակարարումները ԱՄՆ նախագահի հետ քննարկելու կարևորությունը՝ նշելով, որ Ուկրաինա տանկերի մատակարարումները պետք է քննարկվեն արևմտյան բարեկամների և դաշնակիցների, հատկապես՝ ԱՄՆ-ի հետ: Իր հերթին Մեծ Բրիտանիան նախատեսում է բրիտանական Challenger 2 տանկեր մատակարարել Ուկրաինային: Գերմանիայի կառավարության խոսնակը, սակայն, հայտնել է, որ Գերմանիայի նախարարների կաբինետն առայժմ չի պատրաստվում փոխել իր դիրքորոշումը. Բեռլինը մերժել է Leopard 2 գերմանական տանկերն Ուկրաինա ուղարկելու կոչերը:
Գերմանիայի կանցլերն է՛լ ավելի մեծ ճնշման տակ է հայտնվել այն բանից հետո, երբ Լեհաստանը որոշեց Leopard 2 տանկեր մատակարարել Ուկրաինային: Politico-ի փոխանցմամբ՝ Վարշավան առաջարկել է Leopard տանկերը Կիևին մատակարարել Եվրոպական երկրների ավելի լայն համագործակցության միջոցով: Լեհաստանի նախագահ Անջեյ Դուդան հայտնել է, որ Լեհաստանում Ուկրաինա տանկեր մատակարարելու որոշումն արդեն ընդունված է։ Նրա խոսքով՝ այս որոշումն իրականցնելու համար «պետք է կատարվեն մի շարք ֆորմալ պահանջներ, ձեռք բերվեն համաձայնություններ»։
Ըստ հրատարակության՝ այս մատակարարումների համար խոչընդոտ է այն, որ Բեռլինը պետք է հավանություն տա գերմանական զենքերի վերաարտահանմանը: Ինչպես ճեպազրույցում ասել է Գերմանիայի կառավարության ներկայացուցիչ Շտեֆեն Հեբեշտրայտը, Բեռլինը տանկերի վերաարտահանման վերաբերյալ կոնկրետ հարցումներ առայժմ չի ստացել։
Ուկրաինայի արտգործնախարար Դմիտրի Կուլեբան Գերմանիայի ARD հանրային հեռարձակող ընկերությանը հարցազրույցում համոզմունք է հայտնել, որ վաղ թե ուշ Գերմանիան կհամաձայնի Leopard տանկեր ուղարկել Ուկրաինա: Bild պարբերականն իր հերթին նշում է, որ Գերմանիան կա՛մ պետք Է Լեհաստանին թույլ տա այդ մատակարարումները, կա՛մ արգելափակի դրանք։ Օգտագործելով «zugzwang» շախմատային տերմինը՝ հոդվածի հեղինակն այն տեսակետն է հայտնում, որ երկու տարբերակներն էլ հարմար չեն Բեռլինի համար: