Պերուի գլխավոր դատախազությունը նախաքննություն կանցկացնի նախագահ Դինա Բոլուարտեի նկատմամբ. հակակառավարական բողոքի ակցիաների ընթացքում ցուցարարների մահվան պատճառով նրան կասկածում են ցեղասպանության մեջ։ Այս մասին հայտնում Է ТАСС գործակալությանը։
«Նախաքննությունը կապված է այնպիսի հանցագործությունների ենթադրյալ կատարման հետ, ինչպիսիք են ցեղասպանությունը, սպանությունը և առողջությանը ծանր վնաս պատճառելը, որոնք կատարվել են 2022 թվականի դեկտեմբերին և 2023 թվականի հունվարին տեղի ունեցած բողոքի ցույցերի ժամանակ Ապուրիմակի, Լիբերտադի, Պունոյի, Խունինի, Արեկիպայի և Այակուչոյի շրջաններում», – նշված է գլխավոր դատախազության հաղորդագրության մեջ, որը հրապարակվել է Twitter-ում: Ավելի վաղ Պերուի գլխավոր դատախազությունը և դրա ղեկավար Պատրիսիա Բենավիդեսը հայտնել էին նախագահի նկատմամբ երկու նախաքննություն սկսելու մասին՝ չհստակեցնելով, թե ինչ հանցագործությունների մեջ է նա կասկածվում։
Գերատեսչությունը հայտնել է, որ բացի Բոլուարտեից, կասկածյալների թվում են նաև վարչապետ Ալբերտո Օտարոլան, ներքին գործերի նախարար Վիկտոր Ռոխասը, պաշտպանության նախարար Խորխե Չավեսը, ինչպես նաև նախկին վարչապետ Պեդրո Անգուլոն և ներքին գործերի նախկին նախարար Սեզար Սերվանտեսը։ Ինչպես ավելի վաղ հայտնել էր «Արմենպրես»-ը, օրերս առնվազն 17 մարդ է զոհվել, 52-ը՝ վիրավորվել Պերուի Խուլյակա քաղաքում բողոքի հակակառավարական ցույցերի ընթացքում: 2022 թվականի դեկտեմբերի 7-ին նախագահ Պեդրո Կաստիլիոյին իշխանությունից հեռացնելուց հետո Պերուում սկսվեցին լայնածավալ բողոքի ցույցեր։
Դրանց մասնակիցները փակել են ճանապարհները, գրավել օդանավակայաններ, գրոհել իշխանության մարմինների և ուժային կառույցների շենքերը։ Անցյալ տարվա դեկտեմբերին տեղի ունեցած բախումների ընթացքում զոհվել է մոտ 30 մարդ, հարյուրավոր մարդիկ վիրավորվել են: