Արդեն 16-րդ օրն է՝ Ստեփանակերտ-Գորիս միջպետական մայրուղին շարունակում է երկկողմանի փակ մնալ։ Սփյուռքը, սակայն, չի արձագանքում այնպես, ինչպես հարկն է։ Ճիշտ է, տարբեր երկրներում հայկակական համայնքները իրենց բողոքի ձայնն են բարձրացնում, ցույցեր ու հանրահավաքներ են կազմակերպում, սակայն Ռուսաստանում, որտեղ մենք ունենք ամենաբազմամարդ սփյուռքը, որևէ նման բան տեղի չի ունենում: Սա այն դեպքում, երբ Ռուսաստանում քիչ չեն նաև արցախցիները: Այս առնչությամբ՝ «Russia-armenia.info» լրատվական կայքի խմբագիր, Հայ-ռուսական կազմակերպությունների համակարգող խորհրդի համանախագահ Արամ Խաչատրյանը «Առաջին լրատվական»-ի հետ զրույցում նշեց. «Ռուսաստանում բազմաթիվ հայկական կազմակերպություններ, այդ թվում Ռուսաստանի հայերի միությունը հանդես են եկել հայտարարություններով:
Մեր Ռուս-հայկական կազմակերպությունների համակարգող խորհուրդը ևս հանդես է եկել հայտարարությամբ՝ ուղղված ՌԴ նախագահ Պուտինին: Այնտեղից ստացել ենք պատասխան, մեզ ուղղորդել են դեպի ԱԳՆ, ԱԳՆ-ից նույնպես մեզ պատասխանել են: Ես համաձայն եմ, որ Ռուսաստանում, որտեղ ամենամեծ հայ համայնքն ունենք, կա իներտությունը: Այո, հիմա Ռուսաստանում այնպիսի օրենքներ են, որ կան սահմանափակումներ հրապարակային ակցիաների առումով: Ռուսաստանի օրենքներով 14-15 օր առաջ պետք է տեղեկացնել կազմակերպվող հրապարակային ակցիայի մասին: Վերջերս էլ նոր օրենք է ընդունվել, ըստ որի արգելվում են ակցիաները պետական հաստատությունների մոտ: Այստեղ հնարավոր է միայն անհատական պիկետներ անել, սակայն դա էլ չի արվում, մարդիկ քնած են: Ռուսաստանի հայությունը շատ իներտ է իրեն պահում: Եթե համեմատենք այլ երկրների հետ, որտեղ հայկական համայնքները շատ ակտիվ են, Ռուսաստանում այդպես չէ, ինչը պարզապես ամոթ է»,-ասաց նա: Արամ Խաչատրյանը հավելեց, որ մի շարք ռուս քաղաքագետներ, քաղաքական գործիչներ բարձրացնում են իրենց ձայնը հաջակցություն Արցախի ու Հայաստանի. «Այնպիսի քաղաքագետ, ինչպիսին ՄԳԻՄՕ-ի ռազմաքաղաքական հետազոտությունների կենտրոնի առաջատար փորձագետ Միխայիլ Ալեքսանդրովն է, իր ձայնն է բարցրացնում հօգուտ Արցախը, ընդդեմ ադրբեջանական «այսպես կոչված» բնապահպանների, ի պաշտպանություն ռուս խաղաղապահների:
Նրա ելույթներին ու հայտարարություններին հետևեյլ է կտրուկ արձագանք Բաքվից, և հայտնի քաղաքագետին հեռացրել են մեկ օրվա ընթացքում, քանի որ ռեկտոր Անատոլի Տորկունովը Ալիևի մոտ ընկերն է: Հայտնի ռուս փորձագետ Սիֆկովը ևս հանդես է եկել հաջակցություն ռուս խաղաղապահների, որին նույնպես սկսել են վախեցնել: Ընդ որում և Սիֆկովի, և Ալեքսանդրովի նկատմամբ Ադրբեջանի դատախազությունը քրեական գործեր է հարուցել: Երկու օր առաջ «Մոսվովսկի կոմսոմոլեց» թերթին տված հարցազրույցում հայտնի ռուս քաղաքական գործիչ և դիվանագետ Նիկոլայ Պլատոշկինը կտրուկ հայտարարություններ է արել: Նա նշել է, որ երբ, ըստ էության, Թուրքիան Ադրբեջանի հետ միասին ագրեսիայի է դիմում Հայաստանի նկատմամբ, Մոսկվան Հայաստանին չի օգնում»: Արամ Խաչատրյանի խոսքով, իր համար որպես ռազմական լրագրողի ու հանրային գործչի, վիրավորական է, որ Ռուսաստանը որևէ քայլ չի ձեռնարկում. «Խոսակցությունները, թե Ռուսաստանն աշխատում է այդ ուղղությամբ, 2 օրից, 3 օրից, 4 օրից կբացվի միջանցքը, արդեն չեն բավարարում: Մենք հասկանում ենք, որ նոյեմբերի 9-ի հայտարարությամբ Ռուսաստանն իր վրա վերցրել է պարտավորություն՝ ապահովել Լաչինի միջանցքի անխափան գործունեությունը: Հիմա ստացվում է, որ այնտեղ են եկել ադրբեջանցի սադրիչներ, որոնք արգելափակել են ճանապարհը: Փաստացի Արցախի Հանրապետությունը 17 օր բլոկադայի մեջ է: Մեզ համար շատ վիրավորական է, որ Ռուսաստանն ակտիվ գործողությունների չի դիմում, և Ադրբեջանն օգտվում է դրանից: Ես դեռ մի քանի տարի առաջ մի քանի հոդված էի գրել, որտեղ նշել էի, որ շատ վիրավորական է, որ Մոսկվայում հավասարության նշան են դնում Հայաստանի և Ադրբեջանի միջև, որ դրանից ադրբեջանցիներն ավելի են լկտիանում և դիմում տարբեր հանցագործությունների: Մենք պետք է կոչ անենք Ռուսաստանին, ռուսական խաղաղապահ ուժերին՝ դիմել ավելի գործուն միջոցների: Բոլորը պետք է հասկանան, որ Ռուսաստանի այս կեցվածքը արժեզրկում են Ռուսաստանի դերը որպես խաղաղապահների, այդ թվում ռուսական խաղաղապահների կարգավիճակը: Ես կոչ եմ անում ռուսական զինված ուժերին ավելի ակտիվորեն զբաղվել այդ հարցով և բացել Արցախի արգելափակումը»,-ընդգծեց նա:
