Հայկական կողմին բազմիցս զգուշացրել եմ, որ անիմաստ գումար է վատնում սպառազինության վրա։ Այս մասին հայտարարել է Ադրբեջանի նախագահ Իլհամ Ալիևը՝ ադրբեջանական առաջատար լրատվամիջոցների ներկայացուցիչներին տված մամուլի ասուլիսում։
«Նախ, դա չի օգնի ձեզ (խմբ․ Հայաստանին), և երկրորդ՝ կարող է պատրանք ստեղծել որոշ ռևանշիստական ուժերի մոտ, որ դուք կկարողանաք վրեժ լուծել»,- ասել է Ալիևը։
Նա հավելել է՝ եթե իրենք վտանգ զգան, անմիջապես կճնշեն այն՝ անկախ նրանից, թե որտեղ է հայտնվել այդ սպառնալիքը՝ իրենց տարածքում, թե սահմաններից դուրս։
«Դա մեր օրինական իրավունքն է»,- նշել է նա։
Անդրադառնալով երրորդ երկրների կողմից Հայաստանին զենք մատակարարելու հարցին՝ Ալիևը նշել է, որ նման փորձեր նկատվում են։
«Մենք տեսնում ենք, թե որ երկրներն են պատրաստվում զենք տալ Հայաստանին։ Ցավոք, նրանց թվում է Հնդկաստանը, և մենք դա համարում ենք ոչ բարեկամական քայլ, քանի որ այդ հարձակողական զինատեսակների թիրախը միայն Ադրբեջանն է։ Իհարկե, մենք ձեռնարկում ենք անհրաժեշտ միջոցներ, և չենք կարող թույլ տալ, որ Հայաստանը վտանգ ներկայացնի մեզ համար»,- ասել է Ադրբեջանի նախագահը։
Ալիևը նաև հայտարարել է, որ Հայաստանը փորձում է «խուսափել Զանգեզուրի միջանցքի գործարկման հետ կապված իր պարտավորությունների կատարումից», սակայն այս նախագիծը կյանքի կկոչվի։ Նրա խոսքով՝ Զանգեզուրի միջանցքի բացումը նշված է Ադրբեջանի, Ռուսաստանի և Հայաստանի ղեկավարների 2020 թվականի նոյեմբերի 10-ի եռակողմ հայտարարության մեջ։
«Այո, «Զանգեզուրի միջանցք» բառ չկա, քանի որ «Զանգեզուրի միջանցք» տերմինն աշխարհաքաղաքական լեքսիկոն ներմուծեցի ավելի ուշ։ Բայց այնտեղ հստակ ասվում է, որ Ադրբեջանի արևմտյան շրջանների և Նախիջևանի Ինքնավար Հանրապետության միջև պետք է տրանսպորտային կապ հաստատվի, և Հայաստանը պետք է դա ապահովի։ Հայաստանը երկու տարուց ավելի է չի կատարում իր պարտավորությունները, բայց դա մեզ չի կանգնեցնի։ Մեզ համար սա ռազմավարական նախագիծ է, և ոչ միայն մեզ համար»,- ասել է Ալիևը։
Նա նաև հավելել է, որ Զանգեզուրի միջանցքի իրականացումը պատմական անհրաժեշտություն է Ադրբեջանի համար։
«Ուստի ես ասացի, որ Հայաստանը ուզի, թե չուզի՝ այն կգործարկվի։ Հայաստանում սա կրկին ընկալում են որպես հերթական սպառնալիք, թեև նման միտք չի եղել, դա ուղղակի անխուսափելի է»,- ասել է Ադրբեջանի նախագահը` նշելով, որ Բաքուն կցանկանար, որ դա տեղի ունենար որքան հնարավոր է շուտ։
