«Մոսկվայում հստակ հասկանում են և մեզ համար բավականին ակնհայտ է, որ Փաշինյանի նպատակը Հայաստանի արատաքին քաղաքական վեկտորն ամբողջությամբ փոխելն է՝ այսինքն դուրս գալ Ռուսաստանի ազդեցության գոտուց, դրա հետ միասին հանձնել նաև Ղարաբաղը։ Հիմա նա աստիճանաբար հենց այդ ծրագիրն է իրականացնում»,-«Առաջին լրատվական»-ի հետ զրույցում անդրադառնալով վարչապետ Փաշինյանի մամլո ասուլիսի ժամանակ ՌԴ-ի և ՀԱՊԿ-ի հասցեին հնչեցրած հայտարարություններին, ասաց ռուս ռազմական վերլուծաբան Ալեքսանդր Խրամչիխինը։
Հարցին, արդյոք Փաշինյանը օբյեկտիվ հիմքեր չունի ՀԱՊԿ-ից դժգոհելու, Խրամխչինը պատասխանեց.«ՀԱՊԿ-ն իսկապես Հայաստանին լուրջ օգնություն չի տրամադրել, ինչը և սպասելի էր, բայց ՀԱՊԿ-ն ինքնին այնպես է կառուցված, որ այնտեղ ոչ մեկ ոչ մեկին չի պատրաստվում օգնություն ցույց տալ։ Այդ կառույցով ոչ ոք լուրջ չի զբաղվելու, այն աստիճանաբար կդադարի գոյություն ունենալ»։
Միևնույն ժամանակ մեր զրուցակիցն ասաց՝ Հայաստանը ֆորմալ առումով ունի հիմքեր ՀԱՊԿ-ից դժգոհելու, բայց Ռուսաստանն էլ հիմքեր ունի դժգոհելու ՀԱՊԿ-ի մյուս բոլոր անդամներից՝ այդ թվում նաև Հայաստանից.«Հենց դրա համար էլ կառույցն ունի գործունեության շատ կասկածելի հեռանկարներ։ Հայաստանն ու դաշնակիցների մի մասը չաջակցեցին Ռուսաստանին Ուկրաինայում հատուկ գործողության ժամանակ։ Մինչև այդ էլ՝ ոչ մեկ նույնիսկ Ղրիմը չճանաչեց ռուսական, ոչ մեկ Ռուսաստանին տեսանելի աջակցություն չցուցաբերեց Սիրիայում։ Այսինքն՝ ամեն մեկն իր շահն է առաջ տանում, բայց հենց ինչ-որ բան է լինում Ռուսաստանը՞ պետք է աջակցի։Այսինքն՝ Ռուսաստանը բոլորին պարտական է, իսկ իրեն ոչ ոք պարտական չէ՞։ Իրար մեջ էլ ոչ ոք, ոչ մեկին որևէ բան պարտական չէ, այդ կառույցն ի՞նչ իմաստ ունի»։
Անդրադառնալով Փաշինյանի այն հայտարարությանը, որ Ռուսաստանը ոչ միայն չի լուծում Հայաստանի անվտանգային սպառնալիքները, այլ ստացվում է իր լռությամբ ինքն է սպառնալիք ստեղծում, Ալեքսանդր Խրամչիխինն ասաց.«Եթե Հայաստանը դուրս գա ՀԱՊԿ-ից, որևէ այլ տեղից անվտանգային երաշխիքներ չի ստանա։ Հայաստանը վերջնականապես կկորցնի Ղարաբաղը, որից հետո էլ ամբողջությամբ կախման մեջ կըկնկի Թուրքիայից ու Ադրբեջանից։ Ենթադրել, որ արևմուտքը կդառնա Հայաստանի անվտանգության երաշխավորը, կարելի է միայն այն դեպքում, երբ կորցնես իրականության հետ կապը։Բայց դա Հայաստանի խնդիրն է։ Դա է ուզում, դա էլ կստանա»,-եզրափակեց նա։