ԱՄՆ Գլխավոր դատախազ Մերրիկ Գարլանդը Չիկագոյի ԱՄՆ դատախազին հանձնարարել է ուսումնասիրել գաղտնի փաստաթղթերը, որոնք հայտնաբերվել են Վաշինգտոնի Փենսիլվանիայի համալսարանում Բայդենի անվան դիվանագիտական և գլոբալ համագործակցության կենտրոնում: Այս մասին CBS News-ին հայտնել են հետաքննության մասին տեղյակ երկու աղբյուրներ:
Նշվում է, որ հայտնաբերված շուրջ 10 փաստաթղթերը եղել են կենտրոնում գտնվող գրասենյակում, որը նախագահ Բայդենն օգտագործում էր Բարաք Օբամայի վարչակազմում փոխնախագահ աշխատելու տարիներին:
Փաստաթղթերը հայտնաբերվել են նոյեմբերի 2-ին՝ միջանկյալ ընտրություններից առաջ, Բայդենի անձնական իրավաբանների կողմից, երբ նրանք հավաքում էին իրերը, որպեսզի ազատեն վերլուծական կազմակերպության գրասենյակը: Թե ինչ տեղեկություններ կան փաստաթղթերում, չի բացահայտվում, սակայն ըստ CBS-ի աղբյուրների՝ դրանք միջուկային գաղտնիքներ չեն պարունակում:
ԱՄՆ-ի Կոնգրեսի Ներկայացուցիչների պալատի նոր խոսնակ, հանրապետական Քևին Մաքքարթին հայտարարել է, որ Ջո Բայդենի՝ ԱՄՆ-ի փոխնախագահի պաշտոնում աշխատելու ժամանակաշրջանում գաղտնի փաստաթղթերի հայտնաբերման հետ կապված իրադրությունը «լուրջ անհանգստություն» է առաջացնում։
«Նրա (Բայդենի) մոտ եղել են այդ գաղտնի փաստաթղթերը, իսկ ի՞նչ էր նա ասում մյուս նախագահի մասին, ում մոտ գաղտնի փաստաթղթեր կային», – ասել է Մաքքարթին:
Սպիտակ տնից հանված գաղտնի նյութերի պահպանումն անցյալ տարի պատճառ էր դարձել նախկին նախագահ Դոնալդ Թրամփի ունեցվածքի խուզարկության համար, և նրան սպառնում է քրեական հետապնդում։ Չնայած երկու դեպքերի միջև զուգահեռներ են անցկացվում, սակայն, ըստ լրատվամիջոցի, դրանց մասշտաբները լիովին տարբեր են:
Դոնալդ Թրամփի Մար-ա-Լագո կալվածքի խուզարկության արդյունքում հարյուրավոր գաղտնի փաստաթղթեր են հայտնաբերվել:
Այդ փաստաթղթերում, ի թիվ այլ նյութերի, եղել են գաղտնիքներ երկրի միջուկային հնարավորությունների վերաբերյալ, ինրպես նաև Դոնալդ Թրամփի ու Հյուսիսային Կորեայի առաջնորդ Կիմ Չեն Ընի միջև նամակագրությունը:
