Թուրքիան իրականացնում է վերազինման հավակնոտ ծրագիր և այն հիմնականում լրացնում է իր իսկ արդյունաբերությունից: Թուրքիան ավելի ու ավելի է մոտենում զենքի ինքնապահովման խնդրին:
Ինչպես գրում է Die Welt-ը, կար ժամանակ, երբ Թուրքիան ցանկանում էր պատվիրել 1000 հատ Leopard-2 գերմանական տանկ, բայց յոթ միլիարդ դոլար արժողությամբ գործարքից ոչինչ դուրս չեկավ:
Թուրքիայի նախագահ Ռեջեփ Թայիփ Էրդողանը ցանկանում է, որ Թուրքիան դառնա ռազմական արտադրանքի առումով ինքնաբավ երկիր։ Զենքի ներկրման վրա հույս դնելու փոխարեն Էրդողանը ստեղծում է սեփական հզոր ռազմական արդյունաբերությունը, որը ներառում է անօդաչու թռչող սարքերի, տանկերի, ռազմական ինքնաթիռների, հաուբիցների և ռազմանավերի արտադրություն։
Ստոկհոլմի խաղաղության խնդիրների հետազոտման միջազգային ինստիտուտի (SIPRI) փորձագետների զեկույցի համաձայն՝ թուրքական Aselsan-ը և TUSAŞ-ն աշխարհի 100 լավագույն պաշտպանական ընկերությունների շարքում են։
Թուրքիայի զինված ուժերը ստացել են տեղական ժամանակակից հաուբիցներ (Fırtına 2), որոնք ունեն նույն տրամաչափը՝ 155 մմ, ինչ Գերմանական PzH 2000-ը։ Ավելին, Թուրքիան ռազմարդյունաբերության մյուս առաջատարի՝ Հարավային Կորեայի օգնությամբ տանկերի շարժիչներ է ստեղծում իր Altay տանկի համար։
