Այսօր Ռուսաստանի Դաշնության նախագահ Դմիտրի Մեդվեդևը, Դաշնային խորհրդում ելույթ ունենալով ամենամյա զեկույցով, մի քանի ուշագրավ հայտարարություններ է արել արտաքին քաղաքական զարգացումների վերաբերյալ: Նա ասել է, որ Եվրասիա ողջ մայրցամաքում պետք է ստեղծվի մեկ ընդհանուր տնտեսական գոտի: Նրա խոսքերով, Ռուսաստանի արտաքին քաղաքականության առաջնահերթություններից է ԱՊՀ տարածքը և նրանում գործող Եվրասիական տնտեսական համագործակցությունն (ԵՏՀ) ու Հավաքական անվտանգության կազմակերպությունը: «Մենք արդեն ձևավորել ենք Մաքսային միություն և և ընդհանուր տնտեսական տարածք ենք ստեղծում ԵՏՀ շրջանակներում»:
Խոսելով հակահրթիռային պաշտպանության մասին՝ Մեդվեդևը նշել է, որ եթե առաջիկա 10 տարիների ընթացքում չստեղծվի միացյալ հակահրթիռային պաշտպանության համակարգ, ապա դա կարող է հանգեցնել սպառազինությունների նոր մրցավազքի: Նա ասել է, որ Ռուսաստանի և ՆԱՏՕ-ի միջև այժմ բանակցություններ են գնում դրա շուրջ: Մեդվեդևի խոսքերով՝ միացյալ հակահրթիռային պաշտպանության համակարգին միանալու համար անհրաժեշտ կլինի միավորել ներռուսաստանյան հակաօդային և հակահրթիռային պաշտպանության համակարգերը:
